మంచు విష్ణు సినిమా ఏమైంది?

ఒక సినిమా ఫ్లాప్ అయితే కావచ్చు. కానీ ఒక సినిమా రిలీజైనట్లు తెలియాలి. దాని గురించి చర్చ జరగాలి. ఓపెనింగ్స్ రావాలి. కొంచెం పబ్లిసిటీ చేసి.. సినిమాను వార్తల్లో నిలపాలి. కానీ మంచు విష్ణు సినిమా ‘లక్కున్నోడు’ విషయంలో ఇలా జరగట్లేదు. రిపబ్లిక్ డే వీకెండ్లో ఈ సినిమా రిలీజైన సంగతి కూడా చాలామందికి తెలియకుండా పోయిందంటే ఆశ్చర్యపోవాల్సిందే.

ఫిబ్రవరి 3కు అనుకున్న ‘లక్కున్నోడు’ సినిమాను ‘ఎస్-3’ వాయిదా పడటంతో ఉన్నట్లుండి 26కు మార్చేశారు. రిలీజ్ డేట్ అనౌన్స్ చేశాక మిగిలింది రెండు రోజులే. దీంతో ప్రి రిలీజ్ బజ్ పెద్దగా లేకపోయింది. పబ్లిసిటీ కూడా ఓ మోస్తరుగానే చేశారు. దీనికి తోడు ఆంధ్రప్రదేశ్ కు ప్రత్యేక హోదా మీద విశాఖపట్నంలో 26న నిరసన కార్యక్రమం పెట్టడంతో అందరి ఫోకస్ దాని మీదే నిలిచింది. ఆ రోజు సోషల్ మీడియాలో కానీ.. ఇంకెక్కడా కానీ ఈ సినిమా గురించి పెద్ద డిస్కషనే లేదు. టాక్ కూడా ఏమంత గొప్పగా లేకపోవడం కూడా నెగెటివ్ అయింది. దీంతో సినిమా చర్చల్లో లేకుండా పోయింది.

ఇక పోస్ట్ రిలీజ్ ప్రమోషన్ల వల్ల పెద్దగా ప్రయోజనం లేదనుకున్నారో ఏమో అలాంటి ప్రయత్నమేదీ పెద్దగా చేయలేదు. పబ్లిసిటీ కూడా అలాగే ఉంది మరి. దీంతో సినిమా దెబ్బ తింది. ఈ సినిమాకు థియేటర్లు కూడా తక్కువగానే ఇచ్చారు. కలెక్షన్లు అంతంతమాత్రమే. ఎర్రబస్సు.. డైనమైట్ లాంటి డిజాస్టర్ల తర్వాత ‘ఈడో రకం ఆడోరకం’ లాంటి హిట్ కొట్టి ఊపిరి పీల్చుకున్న మంచు విష్ణు.. ఇప్పుడు ‘లక్కున్నోడు’తో మళ్లీ ట్రాక్ తప్పిపోయాడు. ఇక అతడి ఆశలన్నీ ఫ్యూచర్ ప్రాజెక్టుల మీదే.

Like Us on Facebook : https://www.facebook.com/Tupakidotcom/