ఈడోరకం.. ఆడోరకం.. అదీ చూద్దాం

ఈ మధ్య కాలంలో చాలా కొత్తగా ఏదో చేశాం అని చెబుతున్న ఏ సినిమాలో ఆ 'కొత్త' అనే మాటకు సంబంధించి ఒక్క సీన్‌ కూడా కనిపించట్లేదు. సర్లేండి.. ఇప్పుడు హిట్టు కోసం చాన్నాళ్ళ నుండి వెయిటింగులోనే ఉండిపోయిన మంచు విష్ణు.. అలాగే హిట్టులతో మాంచి ఊపుమీదున్న రాజ్‌ తరుణ్‌ (మొన్ననే ఒక కాజా తిన్నాడులే.. అయినా పర్లేదు).. కలసి ఒక సినిమాతో వస్తున్నారు. అదే ''ఈడోరకం.. ఆడోరకం''.

ఈరోజే ఈ సినిమా ఫస్టు లుక్‌ పోస్టర్‌ విడుదల చేశారు. టైటిల్‌ పరంగా సినిమా ఇంట్రెస్టింగ్‌ గానే అనిపిస్తున్నా.. సినిమా ఎలా ఉండోబోతోంది అనేదే చూడాల్సిన విషయం. ఈ మధ్యన హిట్టు కోసమో లేక కథ కోసమో తెలియదు కాని.. మంచు విష్ణు మల్టీ స్టారర్లను తెగ నమ్మేస్తున్నాడు. ఆ మధ్యన 'పాండవులు పాండవులు తుమ్మెద' అంటూ తమ్ముడితో పాటు చాలామందిని కలిపే దింపాడు.. కాని పెద్దగా ఉపయోగపడ్లేదు. తరువాత డాడ్‌ అండ్‌ అల్లరి నరేష్‌ తో 'మామ మంచు అల్లుడు కంచు' అనే సినిమాను తీశాడు కాని.. అదీ బొక్కబోర్లా పడిపోయింది. అయితే ఇప్పటివరకు విష్ణుతో మల్టీ స్టారర్లు చేసిన ఎవ్వరికీ హిట్లు అనేవి లేవు. కాని రాజ్‌ తరుణ్‌ మాత్రం కాస్త అలగ్‌. మనోడు ఫామ్‌ లో ఉన్న యంగ్‌ హీరో. అందుకే ఈసారి 'ఈడోరకం.. ఆడోరకం' అంటే ఆడుతుందేమో అనే అనిపిస్తోంది.

రాజ్ తరుణ్‌ పక్కన సెక్సీ యంగ్‌ బ్యూటి హెబా పటేల్‌ మరోసారి జతకట్టింది. వీరిద్దరే సినిమాకు మాంచి ఎసెట్‌. ఇక విష్ణు సరసన సోనారికా బడోరియా నటిస్తోంది. మరి ఇప్పటివరకు విష్ణు ప్రయత్నించిన మల్టీస్టారర్లన్నీ ఒక రకం.. ఈ సినిమా మాత్రం హిట్టు రకం.. అని ఆడియన్స్‌ అంటారా? వెయిట్‌ అండ్‌ సి.