వాహ్‌!! మంచు విష్ణు మనసు విశాలం

ఓ మంచి పని చేయాలంటే దానికి మంచి మనసు ఉండాలి. టాలీవుడ్ లో చాలా మంది స్టార్స్ సమాజానికి మంచి చేసే కార్యక్రమాలకు సపోర్ట్ ఇస్తూ ఉంటారు. కొందరు తమ సాయాన్ని పదిమందికి తెలిసేలా చేస్తే.. మరికొందరు తెలియకుండా చేస్తూ ఉంటారు. అయితే.. ఓ మంచి పనిని అందరికీ తెలిసేలా చేసి.. మరింతమందికి స్ఫూర్తిగా నిలవాలనే ఆలోచన మాత్రం అందరికీ ఉండదు. ఇలాంటి విషయాల్లో మంచు ఫ్యామిలీ రూటు సెపరేటు అనే విషయంలో సందేహం అక్కర్లేదు.

ప్రస్తుతం నేను సైతం అంటూ ఓ ఛానల్ కోసం ఒక షోని నిర్వహిస్తోంది మంచు వారమ్మాయి లక్ష్మీ ప్రసన్న. ఈ కార్యక్రమంలో అనేకమంది సెలబ్రిటీలు భాగమయ్యి తోచినంత సాయం చేస్తున్నారు. ఇప్పుడు మంచు విష్ణు కూడా మేము సైతం ప్రోగ్రామ్ కోసం పానీపూరీ అమ్మాడు. అంతే కాదు.. అలా సేకరించిగా వచ్చిన 75వేల రూపాయల సొమ్మును కార్యక్రమ నిర్వాహకులకు అందించాడు. ఇంతకుమించి చెప్పుకోవాల్సిన విషయం ఏంటంటే.. దుర్గా గౌడ్ అనే జర్నలిస్ట్ కి పక్షవాతం రావడంతో వారి పిల్లల చదువులు ఇబ్బందుల్లో పడిపోయాయి. ఈ ఖర్చును భరించేందుకు మంచు విష్ణు సై అన్నాడు. ఆ మొత్తం ఎంతో తెలుసా.. 22 లక్షల రూపాయలు.

భారీ ప్రకృతి విపత్తుల సమయంలోనే 5 - 10 లక్షల విరాళంతో సరిపెట్టేస్తుంటారు చాలామంది సెలబ్రిటీలు. కానీ ఒక కుటుంబం కోసం ఏకంగా 22 లక్షల సాయం అందించేందుకు ముందుకొచ్చిన మంచు విష్ణును చూస్తే.. అతని మనసు ఎంత విశాలమో అర్ధమవుతుంది.