ఇంగ్లీష్, తెలుగు, హిందీ బాషలలో విష్ణు 'మోసగాళ్లు'

టాలీవుడ్ లో హీరోగా ఎంట్రీ ఇచ్చి ఎన్నో ఏళ్ళు గడిచినా మంచు విష్ణు మాత్రం సరైన మాస్ బ్లాక్ బస్టర్ ని ఇంతవరకు అందుకోలేక పోయాడు. గత రెండేళ్లుగా విష్ణు నుండి సినిమాలేవీ రాలేదు. కొన్నేళ్లుగా వరుస ప్లాప్ చిత్రాలను ఎదుర్కొని చాలా గ్యాప్ తీసుకున్నాడు. కొంతకాలంగా విష్ణు మళ్లీ రీఎంట్రీ ఇవ్వడానికి ట్రై చేస్తున్నాడట. కానీ ఈసారి పక్కా ప్రణాళికతో తెరమీదకి రాబోతున్నాడట. ఇక ప్రస్తుతం విష్ణు "మోసగాళ్లు" అనే సినిమాతో రావడానికి రెడీ అవుతున్నాడు. సినిమాలు ఆపేసిన తర్వాత విష్ణుకి మార్కెట్ చాలా పడిపోయింది. అలాంటిది తెలుగులోనే సరిగ్గా మార్కెట్ లేని విష్ణు ఒక్కసారిగా మీడియా పరంగా "మోసగాళ్లు" సినిమాను హాలీవుడ్ లో రిలీజ్ చేస్తాను అనేసరికి అందరిలో కాస్త ఆసక్తి నెలకొంది. ఇంత గట్టి నిర్ణయం తీసుకున్నాడంటే ఖచ్చితంగా సినిమాలో మ్యాటర్ ఉండే ఉంటుందని ప్రేక్షకులు భావిస్తున్నారు.

అయితే ఇటీవలే విష్ణు మోసగాళ్లు సినిమా గురించి కొన్ని ఆసక్తికర విషయాలను చెప్పుకొచ్చాడు. రెండు సంవత్సరాల క్రితం వరుస ప్లాప్ లను ఎదుర్కోలేక అమెరికా వెళ్లానని, అక్కడ ఇద్దరు హాలీవుడ్ రైటర్స్ ని తీసుకొని ఇండియాలో జరిగిన అతిపెద్ద ఐటీ స్కాం గురించి కథ రెడీ చేసాడట. ఆ కథతో కేవలం హాలీవుడ్ డైరెక్టర్ని పెట్టుకొని ఇంగ్లీష్ లోనే విడుదల చేద్దామని అనుకున్నాడట. ఇంతలో ఒక వ్యక్తి సలహా మేరకు తెలుగులో కూడా రిలీజ్ చేస్తే బాగుంటుందని, తెలుగులో మోసగాళ్లు పేరుతో మొదలుపెట్టారు. ఈ సినిమా ఇంగ్లీష్, తెలుగు, హిందీ బాషలలో రిలీజ్ కానున్నట్లు ప్రకటించాడు. హాలీవుడ్ తో పాటు తెలుగు ప్రేక్షకులకు నచ్చేలా మంచి ఎమోషన్స్ మెయింటైన్ చేసినట్లు తెలిపాడు. అయితే ముందుగా జూన్ 5న తెలుగులో రిలీజ్ చేసి, ఆ తర్వాత జులైలో హాలీవుడ్ లో రిలీజ్ కి ప్లాన్ చేస్తున్నట్లు విష్ణు తెలియజేసాడు. ఇండియన్ ఐటీ స్కామ్ కథ అనేసరికి ప్రేక్షకుల్లో కొంత ఆసక్తి అయితే నెలకొందని చెప్పాలి!