ఈ ఎలెక్షన్స్ వేడిలో ఓటర్ వస్తాడట!

మంచు విష్ణు హీరో గా 'ఓటర్' అనే సినిమాలో నటించాడు. జి. కార్తీక్ రెడ్డి దర్శకత్వంలో తెరకెక్కిన ఈ చిత్రం నిజానికి 2017 చివర్లోనో లేదా 2018 ప్రథమార్థం లోనే రిలీజ్ కావలిసి ఉంది కానీ ఇప్పటివరకూ విడుదల కాలేదు. షూటింగ్ మొత్తం పూర్తయినా ఇంకా విడుదలకు నోచుకోకుండా ల్యాబ్ లోనే ఉంది. ఫైనల్ గా ఈ సినిమాకు మోక్షం రానుందట. విష్ణు ఈ సినిమా రిలీజ్ చేసేందుకు ప్రయత్నాలు చేస్తున్నాడట.

త్వరలో ఎన్నికల సీజన్ వస్తోంది కాబట్టి రాజకీయాల నేథ్యంలో తెరకెక్కిన 'ఓటర్' కు డిమాండ్ ఉంటుందని భావించి ఏప్రిల్ లోనే ఈ సినిమాకు ప్రేక్షకుల ముందుకు తీసుకొచ్చేందుకు విష్ణు సన్నాహాలు చేస్తున్నాడని సమాచారం. త్వరలోనే ఈ సినిమా ప్రమోషన్ కార్యక్రమాలు మొదలుపెడతారట. ఈ సినిమాలో విష్ణుకు జోడీగా సురభి హీరోయిన్ గా నటించింది. పోసాని కృష్ణమురళి ఒక కీలకపాత్రలో నటించారు. థమన్ ఈ చిత్రానికి సంగీత దర్శకుడు.

ఇదిలా ఉంటే ఈ సినిమా తర్వాత శ్రీను వైట్ల దర్శకత్వంలో తన నెక్స్ట్ సినిమా చేసేందుకు విష్ణు రెడీ అవుతున్నాడట. గతంలో వీరిద్దరి కాంబినేషన్లో 'ఢీ' అనే సూపర్ హిట్ సినిమా తెరకెక్కింది. దీంతో కొత్త సినిమా 'ఢీ' సీక్వెల్ అనే స్పెక్యులేషన్స్ జోరుగా సాగుతున్నాయి. త్వరలోనే ఈ సినిమాకు సంబంధించిన వివరాలు కూడా వెల్లడవుతాయి.