ఫోటో స్టోరీ : బాలీవుడ్‌ స్టార్స్‌ తో మంచు స్టార్‌

మంచు విష్ణు ప్రస్తుతం హాలీవుడ్‌ దర్శకుడు జెఫ్రీ గీ చిన్‌ దర్శకత్వంలో ఒక చిత్రాన్ని చేస్తున్నాడు. ఇంగ్లీష్‌ లో తెరకెక్కుతున్న ఈ చిత్రంలో బాలీవుడ్‌ స్టార్‌ నటుడు సునీల్‌ శెట్టి కీలక పాత్రలో నటిస్తున్నాడు. ఇంకా టైటిల్‌ ఖరారు కాని ఈ చిత్రంలో చాలా విభిన్నమైన పాత్రను మంచు విష్ణు పోషిస్తున్నట్లుగా ఆయన సన్నిహితుల ద్వారా తెలుస్తోంది. ఈ సినిమాలో వీరిద్దరితో పాటు సంజయ్‌ దత్‌ కూడా ఒక కీలక పాత్రలో కనిపించబోతున్నట్లుగా తెలుస్తోంది.

తాజాగా సినిమా షూటింగ్‌ సందర్బంగా మంచు విష్ణు సునీల్‌ శెట్టి మరియు సంజయ్‌ దత్‌ లతో ఈ ఫొటో తీసుకున్నాడు. మంచు విష్ణు ఈ ఫొటోను సోషల్‌ మీడియా ద్వారా అభిమానులతో షేర్‌ చేసుకున్నాడు. ఇండియన్‌ సినిమాలోని ఇద్దరు దిగ్గజ యాక్షన్‌ స్టార్స్‌. ఇద్దరు గొప్ప యాక్షన్‌ హీరోలతో నాకు నటించే అవకాశం రావడం చాలా అదృష్టంగా భావిస్తున్నాను అంటూ మంచు విష్ణు ట్వీట్‌ చేశాడు.

ఈ సినిమా నిర్మాణంలో మంచు విష్ణు భార్య విరానికా భాగస్వామిగా ఉన్నట్లుగా సమాచారం అందుతోంది. ఇంగ్లీష్‌ తో పాటు తెలుగులో కూడా ఈ చిత్రంను చిత్రీకరిస్తున్నారు. మంచు విష్ణు షేర్‌ చేసిన ఈ ఫొటోతో ఈ చిత్రంపై అంచనాలు పెరుగుతున్నాయి. అంచనాలకు తగ్గట్లుగా ఈ చిత్రంను దర్శకుడు జెఫ్రీ గీ చిన్‌ తెరకెక్కిస్తున్నాడని మంచు విష్ణు సన్నిహితులు చెబుతున్నారు. అతి త్వరలో ఈ చిత్రం పూర్తి వివరాలను వెళ్లడించే అవకాశం ఉంది.