స్కెచ్ లతోనే మణిరత్నం సెన్సేషన్

దిగ్గజ దర్శకుడు మణిరత్నం కొత్త స్కెచ్ వేసేశారు. ఒకటేంటి.. చాలానే స్కెచ్ లు దగ్గరుండే వేయించేశారాయన. స్కెచ్ అంటే వేరే ఏదో కాదు లెండి.. తన కొత్త సినిమాకు సంబంధించి కేరక్టర్ ఆర్టిస్టులు.. టెక్నీషియన్స్ స్కెచ్ లను విడుదల చేశారు. వాటినే రిలీజ్ చేస్తూ.. తన కొత్త చిత్రాన్ని అఫీషియల్ గా అనౌన్స్ చేశారు.

ఎప్పటిలాగానే తన సొంత బ్యానర్ మద్రాస్ టాకీస్ పైనే ఈ చిత్రం రూపొందనుండగా.. ప్రొడక్షన్ నెం17 అంటూ మణిరత్నం కొత్త సినిమా ప్రకటన వచ్చింది. ఇప్పుడీ చిత్రానికి సంబంధించిన పాత్రధారులను ఇంట్రడక్షన్ ఇస్తూ ఒకేసారి మొత్తం టీం అంతటి స్కెచ్ లను రిలీజ్ చేశారు మణి రత్నం. ఇవే ఇప్పుడు ఆన్ లైన్ ట్రెండింగ్ అయిపోయాయి. ఒక్కో పాత్రకు సంబంధించిన స్కెచ్.. విపరీతంగా షేర్ అయిపోతూ.. ఇంటర్నెట్ లో చక్కర్లు కొట్టేస్తున్నాయి. సినిమాపై విపరీతమైన ఆసక్తి కలిగిస్తున్నాయి. అసలు ఈ మూవీ క్యాస్టింగ్ చూస్తే మైండ్ బ్లాంక్ అవాల్సిందే. తమిళ స్టార్లు శింబు.. విజయ్ సేతుపతి.. అరవింద్ స్వామి.. మలళయాళం నుంచి ఫదా ఫాజిల్.. ఇంకా సీనియర్ హీరోయిన్ జ్యోతిక.. అందాల భామ ఐశ్వర్యా రాజేష్ లు ఈ మూవీ ప్రధాన పాత్రధారులు. ఇంత భారీ క్యాస్టింగ్ ను ఒక చోటకు తీసుకురావడం తన వల్లనే సాధ్యమవుతుందని మణిసార్ మరోసారి ప్రూవ్ చేశారు.

మణిరత్నం అన్ని చిత్రాల మాదిరిగానే.. దీనికి కూడా ఏఆర్ రెహమాన్ సంగీతం అందించనుండగా.. సంతోష్ శివన్ ఛాయాగ్రహణం అందించనున్నాడు.