రెహమాన్ సినిమాలో పాత హీరోయిన్లు

మ్యూజిక్ మాంత్రికుడు ఎ.ఆర్. రెహమాన్ తాజాగా 99 సాంగ్స్ ఓ సినిమా చేయబోతున్నాడు. ఆయన సినిమాల కోసం పనిచేయడం అనేది ఎప్పటి నుంచో ఉన్నా దీనికి మాత్రం ఓ స్పెషాలిటీ ఉంది. ఈ సినిమా స్క్రిప్ట్ స్వయంగా రెహమాన్ రాశాడు. అంతే కాదు.. ఈ చిత్ర సహ నిర్మాత కూడా ఆయనే. ఇంతవరకు పాటలు పాడటమో.. మ్యూజిక్ ఇవ్వడమో మినహాయించి సినిమాల్లో మిగతా క్రాఫ్టుల్లో ఎంటర్ కాని రెహమాన్ స్వయంగా సినిమా నిర్మిస్తుండటం అందరిలోనూ ఇంట్రస్ట్ పెంచింది.

తన ప్రొడక్షన్ లో వస్తున్న 99 సాంగ్స్ కు సంబంధించిన విశేషాలను రెహమాన్ స్వయంగా సోషల్ మీడియా ద్వారా అభిమానులకు షేర్ చేశాడు. ఇందులో ఈ సినిమాలో లీడ్ కపుల్ గా ఎహాన్ భట్- ఎడిల్సీ వర్ఘీస్ ను ఎంచుకున్నారు. సంవత్సరాల తరబడి దాదాపు వెయ్యికి పైనే ఆడిషన్స్ చేశాక వీళ్లిద్దరినీ సెలక్ట్ చేశారు. ఎట్టకేలకు మేము కోరుకున్న సరైన అమ్మాయి.. అబ్బాయిని వెతికి పట్టుకోగలిగామని రెహమాన్ అంటున్నాడు. వెండితెరకు ఓ కొత్త జంటను.. టాలెంట్ ను పరిచయం చేయబోతున్నామని చెప్పుకొచ్చారు. ఈ సినిమాను విశ్వేష్ కృష్ణమూర్తి డైరెక్ట్ చేయబోతున్నాడు.

ఈ సినిమాలో బాలీవుడ్ లో ఓ వెలుగు వెలిగిన నాటి హీరోయిన్లు మనీషా కొయిరాలా.. లీసారే కూడా నటిస్తున్నారు. వీళ్లిద్దరూ బాలీవుడ్ హీరోయిన్లే అయినా స్ట్రయిట్ తెలుగు సినిమాలు కూడా చేశారు. మనీషా నాగార్జున హీరోగా వచ్చిన క్రిమినల్ సినిమాలో హీరోయిన్ గా నటిస్తే.. లీసారే మహేష్ బాబు కౌబాయ్ సినిమా టక్కరిదొంగలో హీరోయిన్ గా చేసింది. కొంతకాలంగా వీళ్లిద్దరూ వెండితెరకు దూరంగా ఉన్నారు. ఇప్పుడు రెహమాన్ సినిమా 99 సాంగ్స్ తో మళ్లీ కెమెరా ముందుకు రానున్నారు. అన్నట్టు ఈ సినిమాలో పదికి పైగానే పాటలు ఉంటాయట. రెహమాన్ సినిమా అన్నాక ఆ మాత్రం పాటలుండాల్లేండి.