ఫోటో స్టొరీ: మన్మథుడు గారి కుటుంబం

అక్కినేని నాగార్జున హీరోగా నటిస్తున్న 'మన్మథుడు 2' ఈమధ్యే సెట్స్ మీదకు వెళ్ళిన సంగతి తెలిసిందే. హీరో కమ్ డైరెక్టర్ రాహుల్ రవీంద్రన్ ఈ సినిమాకు దర్శకుడు. ప్రస్తుతం ఈ సినిమా షూటింగ్ జోరుగా సాగుతోంది. తాజాగా 'మన్మథుడు 2' షూటింగ్ లొకేషన్ నుండి నాగార్జున ఒక ఇంట్రెస్టింగ్ అప్డేట్ ఇచ్చాడు.

క్యాస్ట్ అండ్ క్రూ తో కలిసి దిగిన ఒక సెల్ఫీని తన ట్విట్టర్ ఖాతా ద్వారా పోస్ట్ చేస్తూ "నేను.. నా మన్మథుడు 2 ఫ్యామిలీ. లవింగ్ ఇట్" అంటూ ట్వీట్ చేశాడు. ఫోటోలో డైరెక్టర్ రాహుల్ రవీంద్రన్ తో పాటు హీరోయిన్ రకుల్ ప్రీత్ సింగ్.. లక్ష్మి.. వెన్నెల కిషోర్.. రావు రమేష్.. ఝాన్సి.. తదిరులు దాదాపు పదిహేను మందికిపైగా ఉన్నారు. ఇదో కామెడీ ఎంటర్టైనర్ కావడంతో సెట్స్ లో ఫుల్ గా జోక్స్ తో హంగామా చేస్తున్నారేమో కానీ ఫోటోలో మాత్రం ఒక్కొకరి మొహం డే నైట్ మ్యాచ్ జరిగే స్టేడియం లైట్లలాగా వెలిగిపోతున్నాయి. ఏమాటకామాటే చెప్పుకోవాలి. ఈ వయసులో కూడా నాగార్జున నిజంగా మన్మథుడిలాగానే అందంగా ఉన్నాడు.

2002 లో రిలీజ్ అయిన 'మన్మథుడు' సినిమా నాగార్జున కెరీర్లోనే క్లాసిక్ గా నిలిచింది. విజయ భాస్కర్ దర్శకత్వం.. త్రివిక్రమ్ మాటల మ్యాజిక్.. దేవీ శ్రీప్రసాద్ సంగీతం.. కామెడీ.. లవ్.. ఒకటేంటి.. అన్ని ఆడియన్స్ ను మెప్పించాయి..మరి పదిహేడేళ్ళ తర్వాత ఆ సినిమాకు సీక్వెల్ అంటే అంచనాలు భారీగానే ఉంటాయి. మరి ఈ మన్మథుడు 2 & కో ఎలా వాటిని అందుకుంటుందో వేచి చూడాలి.