జూనియర్‌ మహేష్‌.. ఏంటీ గోల?

ఎవరీ జూనియర్‌ మహేష్‌? ఎక్కడి నుంచి వచ్చాడు? అయినా మహేష్‌ అంత ఇమేజ్‌ ఉన్న హీరోనా? ఇలాంటి సందేహాలు అక్కర్లేదు. 'అతడు' సినిమాలో బుల్లి మహేష్‌ ఈ కుర్రాడే. మనోజ్‌నందం అతడి పేరు. అప్పట్లో ఉవ్వెత్తున ఎగసే కెరటంలా దూసుకొచ్చాడు. ఒక రొమాంటిక్‌ క్రైమ్‌ కథ అనే చిన్న సినిమాతో హీరో అయ్యాడు. తొలి ప్రయత్నమే విజయం అందుకుని అందరి దృష్టిలో పడ్డాడు.

బాలనటుడిగా తెరకి పరిచయమై, ఆ తర్వాత అతడులో మహేష్‌కి చిన్నప్పటి పాత్రలో నటించి ఆకట్టుకున్నాడు. సునీల్‌ కుమార్‌ రెడ్డి అండదండలతో హీరో అయ్యాడు. ఆ తర్వాత ఏకంగా డజను ప్రాజెక్టులకు సంతకాలు చేశాడు. వాటిలో అరడజను పైగానే రిలీజయ్యాయి. అయితే యథావిధిగానే బ్యాక్‌ గ్రౌండ్‌ లేని హీరో పరిస్థితి ఎలా ఉంటుందో మనోజ్‌నందం పరిస్థితి కూడా అలానే అయిపోయింది. ఈ బుల్లి మహేష్‌ నటించిన 'యూత్‌ఫుల్‌ లవ్‌', చాలాకాలం ల్యాబుల్లో మగ్గి ఇప్పుడు బయటకొస్తోంది.

పోనివ్‌ ఇన్ని కష్టాలు పడాల్సి వస్తోంది కదా.. ఏదైనా కొత్తగా ప్రయత్నం చేస్తాడా అంటే.. ఎంతసేపూ హీరోయిన్లతో విస్తృతమైన రొమాన్స్‌ తప్ప ఏమీ కనిపించట్లేదు. ఆ పోస్టర్లను చూస్తుంటే ఈ రేంజులో రొమాన్స్‌ అవసరమా అనిపిస్తోంది. మనోడు రెగ్యులర్‌గా ఇలాంటి ప్రాజెక్టులే చేస్తే బి-గ్రేడ్‌ హీరోగా మిగిలిపోగలడు సుమీ. థింక్‌ మిష్టర్‌ జూ.మహేష్‌.