మనోజ్‌తో మళ్లీ ప్రకాష్‌ రాజ్‌

కొన్ని కాంబినేషన్లు చాలా చిత్రంగా ఉంటాయి. ఆసక్తి రేపుతాయి. ఒకప్పుడు మోహన్‌ బాబు, ప్రకాష్‌ రాజ్‌ కలిసి నటిస్తే అలాంటి ఆసక్తే రేగింది. అప్పటికే దశాబ్దంన్నరగా తెలుగు సినిమాల్లో కొనసాగుతున్నా ఎన్నడూ మోహన్‌బాబుతో కలిసి నటించని ప్రకాష్‌ రాజ్‌.. పొలిటికల్‌ రౌడీ సినిమాతో తొలిసారి మోహన్‌బాబుతో కలిసి నటించాడు. మళ్లీ వాళ్లిద్దరూ ఎప్పుడూ ఒకే సినిమాలో కనిపించలేదు. మోహన్‌బాబు పెద్ద కొడుకు విష్ణుకు ఎప్పుడూ ప్రకాష్‌ రాజ్‌తో కలిసి నటించే అవకాశం దక్కలేదు.

ఐతే విష్ణు తమ్ముడు మనోజ్‌ మాత్రం రెండోసారి ప్రకాష్‌ రాజ్‌తో నటించడానికి రెడీ అవుతున్నాడు. ఇప్పటికే రామ్‌గోపాల్‌ వర్మ 'ఎటాక్‌'లో ప్రకాష్‌ రాజ్‌కు అనుచరుడిగా నటిస్తున్న మనోజ్‌.. తన తర్వాతి సినిమాలోనూ ఈ విలక్షణ నటుడితో తెరను పంచుకోబోతున్నాడు. దశరథ్‌ దర్శకత్వంలో మనోజ్‌ నటించే కొత్త సినిమాలో ప్రకాష్‌ రాజ్‌ ఓ కీలక పాత్ర పోషిస్తున్నాడు. మరి ఈ సినిమాలో మనోజ్‌, ప్రకాష్‌ రాజ్‌ల కెమిస్ట్రీ ఎలా పండుతుందో చూడాలి. ఈ సినిమాలో మనోజ్‌ సరసన రెజీనా కథానాయికగా నటిస్తోంది. ఇప్పటికే ఈశ్వర్‌ దర్శకత్వంలో ఓ లవ్‌ స్టోరీ ఒప్పుకున్న మనోజ్‌.. రెండు సినిమాల్ని పార్లల్‌గా పూర్తి చేయాలని భావిస్తున్నాడు. అటాక్‌ మూవీ జులైలో ప్రేక్షకుల ముందుకు రానుంది.