గోపీచంద్ ఫ్యాన్స్ గర్వపడే సినిమా ఇది: మారుతి

గోపీచంద్ - తమన్నా నాయకా నాయికలుగా 'సీటీమార్' సినిమా రూపొందింది. సంపత్ నంది దర్శకత్వం వహించిన ఈ సినిమా, ఈ నెల 10వ తేదీన థియేటర్లకు రానుంది. ఈ నేపథ్యంలో ఈ సినిమా ప్రీ రిలీజ్ ఈవెంట్ గ్రాండ్ గా జరిగింది. ఈ వేడుకకు హాజరైన దర్శకుడు మారుతి మాట్లాడుతూ .. "ఈ రోజున ఇక్కడ చాలా సందడిగా ఉంది ... ఒక పండుగ వచ్చినట్టుగా ఉంది. గోపీచంద్ ఫ్యాన్స్ కి ఫుల్ మీల్స్ దొరికినట్టే. కరోనా తరువాత ప్ర్రేక్షకులకు ... థియేటర్లకు మంచి ఎనర్జీని ఇచ్చే సినిమా ఒకటి రావాలి అని అనుకుంటూ ఉండేవాడిని.

అలాంటి పరిస్థితుల్లో ఒక విజిల్ వేసి మరీ ఈ సినిమా టీమ్ ధైర్యంగా రిలీజ్ డేట్ ను ఎనౌన్స్ చేసింది. వినాయక చవితి రోజున ఈ సినిమా థియేటర్లలో శుభారంభాన్ని పలుకుతుందని నేను భావిస్తున్నాను. ఆల్రెడీ రిలీజ్ కి ముందే ఈ సినిమాకి పాజిటివ్ టాక్ రావడం నాకు చాలా సంతోషాన్ని కలిగిస్తోంది. ప్రస్తుతం నేను గోపీచంద్ తో 'పక్కా కమర్షియల్' చేస్తున్నాను. ఈ సినిమాతో మా మధ్య సాన్నిహిత్యం పెరిగిపోయింది. ఆయన నాతో ఒక సొంత బ్రదర్ లా ఉంటారు. తెరపై కనిపించే గోపీచంద్ వేరు .. బయట కనిపించే గోపీచంద్ వేరు. అలాంటి ఒక మంచి మనిషితో కలిసి పనిచేయడం నా అదృష్టం.

ఇంతకాలం గోపీచంద్ ను తెరపై ఒకలా చూస్తూ వచ్చాము. ఈ సినిమా తరువాత ఇక కొత్త గోపీచంద్ ను చూస్తారు. ఎందుకంటే కథల ఎంపికలో .. ప్రాజెక్టుల ప్లానింగ్ లో ఆయన చాలా జాగ్రత్తగా వ్యవహరిస్తున్నారు. ఇక నుంచి గోపీచంద్ నుంచి ఫ్యాన్స్ గర్వపడే సినిమాలు వస్తాయి. ఆయన అభిమానులంతా కాలర్ ఎగరేసి తిరగొచ్చు" అంటూ చెప్పుకొచ్చాడు. ఆ తరువాత ఈ సినిమాను గురించి దర్శకుడు శ్రీవాస్ మాట్లాడాడు. "సెకండ్ లాక్ డౌన్ తరువాత పూర్తి మాస్ ఎలిమెంట్స్ ఒక సినిమా రావడం ఇదే ఫస్టు అని నేను అనుకుంటున్నాను.

ఈ సినిమా ఒక దిక్సూచి లా ముందు వెళుతోంది. ఈ సినిమాకి పబ్లిసిటీ పరంగా కూడా తమవంతు కృషి చేశారు. మీడియావారు .. ఆడియన్స్ ఈ సినిమాను ఇంకా ముందుకు తీసుకువెళ్లవలసిన అవసరం ఉంది. ఇది మన సినిమా అనే ఒక సపోర్ట్ ఇప్పుడు అవసరం. గోపీచంద్ గారు నాలాంటి ఎంతోమంది దర్శకులను ఇండస్ట్రీకి ఇచ్చారు. 'లక్ష్యం' సినిమాతో నాకు ఫస్టు ఛాన్స్ ఇచ్చిన గోపీచంద్ గారు ఎప్పుడూ నాకు స్పెషలే. ఆయనతో చేసిన 'లౌక్యం' కూడా హిట్ అయింది. మా కాంబినేషన్లో ఇప్పుడు మరో సినిమా చేయనున్నాము.

'సీటీమార్' కొత్త రికార్డులు సృష్టించాలి .. ఆ రికార్డులను 'పక్కా కమర్షియల్' బద్దలు కొట్టేయాలి. ఆ తరువాత వచ్చే మా హ్యాట్రిక్ సినిమా ఆ రికార్డులను బద్దలు కొట్టేయాలని కోరుకుంటున్నాను. 'సీటీమార్' పెద్ద హిట్ అవుతుందని నాకు మనస్ఫూర్తిగా అనిపిస్తోంది. ఈ సినిమా కోసం సంపత్ నంది ఎంతగా కష్టపడ్డాడనేది నాకు అర్థమవుతోంది. ఈ సినిమాతో మొదలయ్యే సీటీమార్ .. ఇక గోపీచంద్ సినిమాలన్నింటికీ కంటిన్యూ కావాలని కోరుకుంటున్నాను" అని చెప్పుకొచ్చాడు.