చైతూ-మారుతి.. సుధీర్-శర్వా

‘జులాయి’ సినిమాతో టాలీవుడ్లోకి నిర్మాతగా అరంగేట్రం చేసిన ఎస్.రాధాకృష్ణ.. త్రివిక్రమ్ శ్రీనివాస్ కు అత్యంత సన్నిహితుడిగా మారి.. అతడితో వరుసగా సినిమాలు చేస్తూ పెద్ద నిర్మాతగా ఎదిగాడు. ఓవైపు త్రివిక్రమ్ దర్శకత్వంలో రాధాకృఫ్ణ పెద్ద సినిమాలు తీస్తూనే.. ‘సితార ఎంటర్టైన్మెంట్స్’ అనే మరో బేనర్ పెట్టి వేరే దర్శకులతో మీడియం రేంజి సినిమాలు చేస్తున్న సంగతి తెలిసిందే. ఈ బేనర్ నుంచి బాబు బంగారం.. ప్రేమమ్ లాంటి సినిమాలొచ్చాయి. ఇప్పుడు ఇదే బేనర్లో ఒకేసారి రెండు సినిమాలు సెట్స్ మీదికి వెళ్లబోతున్నాయి.

ఇందులో ఒకటి ఇప్పటికే వార్తల్లో ఉన్న సుధీర్ వర్మ-శర్వానంద్ సినిమా కాగా.. ఇంకొకటి కొత్తగా తెరమీదికి వచ్చిన నాగచైతన్య-మారుతి కాంబినేషన్లో రాబోయే చిత్రం. ‘యుద్ధం శరణం’ పూర్తి చేసి చందూ మొండేటితో ‘సవ్యసాచి’ని మొదలుపెట్టే ప్రయత్నంలో ఉన్న చైతూ.. మారుతి దర్శకత్వంలోనూ ఓ సినిమాకు ఓకే చెప్పాడు. ఈ ఆసక్తికర కాంబినేషన్ లో సినిమా త్వరలోనే మొదలవుతుంది. ఇంతకుముందు అఖిల్ హీరోగా సినిమా చేయాలని చూశాడు మారుతి. కానీ అది కుదర్లేదు. ఇప్పుడు అఖిల్ అన్నయ్య చైతూతో సినిమా ఓకే అయింది. మారుతి ప్రస్తుతం‘మహానుభావుడు’ తీస్తున్న సంగతి తెలిసిందే. ఆ సినిమాలో హీరోగా నటిస్తున్న శర్వానంద్ హీరోగా సుధీర్ తీసే సినిమాను కూడా సితార ఎంటర్టైన్మెంట్సే నిర్మించనుంది.