బాబు బంగారం.. తనకు ఓకే అంటున్నాడు

‘భలే భలే మగాడివోయ్’ సినిమాతో రెండేళ్ల కిందట భారీ విజయాన్ని ఖాతాలో వేసుకున్నాడు మారుతి. అప్పటిదాకా ఎక్కువ కొత్త వాళ్లు.. పెద్దగా పేరు లేని వాళ్లతో చిన్న సినిమాలు తీస్తూ హిట్లు కొడుతూ సాగిపోయిన మారుతి.. ఈ సినిమాతో తన రేంజ్ ఎంతో పెంచుకున్నాడు. విక్టరీ వెంకటేష్ లాంటి స్టార్ హీరో పిలిచి మరీ అతడికి అవకాశం కల్పించాడు. వీళ్లిద్దరి కాంబినేషన్లో తెరకెక్కిన ‘బాబు బంగారం’ మీద ప్రేక్షకులు చాలా ఆశలు పెట్టుకున్నారు. కానీ ఆ ఆశల్నీ నీరుగార్చేసిందా చిత్రం. ఐతే ప్రేక్షకులు తిరస్కరించిన ఈ సినిమా విషయంలో తాను మాత్రం సంతృప్తి చెందినట్లు చెబుతున్నాడు దర్శకుడు మారుతి.

తన కొత్త సినిమా ‘మహానుభావుడు’ ప్రమోషన్ల సందర్భంగా ‘బాబు బంగారం’ ఫలితం గురించి ప్రస్తావిస్తే... ‘‘ఒక పెద్ద హీరోతో అలాంటి కథ చేయాలనుకున్నాను. అలాగే చేశాను. నేను ఎంత సక్సెస్ అయితే అనుకున్నానో అంత సక్సెస్ వచ్చింది. అది నాకు ఓకే. ఆ సినిమా వల్ల చాలామంది హ్యపీ. కానీ ఆ కథను ఇంకా బాగా చేసి ఉండొచ్చు అనే ఫీలింగ్ అయితే ఇప్పటికీ నాలో ఉంది’’ అని మారుతి అన్నాడు. ఇక తన కొత్త సినిమా ‘మహానుభావుడు’ను ‘భలే భలే మగాడివోయ్’తో పోలుస్తుండటంపై మారుతి స్పందిస్తూ.. ‘‘మంచిదే కదా. ఆ సినిమాను కూడా నేనే డైరెక్ట్ చేశాను. నా సినిమాను వేరే చెత్త సినిమాతో కాకుండా నేను తీసిన హిట్ సినిమాతోనే పోలుస్తున్నారు’’ అని చెప్పాడు.