ఇక మంచి సినిమాలే తీస్తాన‌న్న మారుతి

మెగా ఫ్యామిలీతో మారుతికున్న అనుబంధం ఎలాంటిదో ప్ర‌త్యేకంగా చెప్పాల్సిన అవ‌స‌రం లేదు. మ‌రీ ముఖ్యంగా అల్లు అర్జున్‌కి అత్యంత స‌న్నిహితుడు మారుతి. తొలినాళ్ల‌ల్లో గీతా ఆర్ట్స్ నుంచి రూపొందిన సినిమాలకి ప‌బ్లిసిటీ సైడ్ ప‌నిచేశాడు మారుతి. బ‌న్నీ ఇచ్చిన ప్రోత్సాహంతో `ఈరోజుల్లో` అనే సినిమా చేశాడు. ఆ సినిమా ఆడియో వేడుక‌కి కూడా బ‌న్నీ, అల్లు అర‌వింద్ హాజ‌రై హైప్ తీసుకొచ్చారు. `ఈరోజుల్లో` ఘ‌న విజ‌యం సాధించ‌డంతో ఇండ‌స్ట్రీలో మారుతి పేరు మార్మోగిపోవ‌డం మొద‌లైంది. ఆ త‌ర్వాత `బ‌స్ స్టాప్‌`, `ప్రేమ‌క‌థా చిత్ర‌మ్‌`ల‌తో వ‌రుస‌గా హిట్టు కొట్టాడు. మూడు వ‌రుస విజ‌యాల త‌ర్వాత చేసిన `కొత్త‌జంట‌` మాత్రం అనుకొన్నంత సంతృప్తినివ్వ‌లేదు. త‌న హోమ్ బ్యాన‌ర్‌ లాంటి గీతాఆర్ట్స్‌ లో చేసిన ఆ సినిమా స‌క్సెస్ కాక‌పోవ‌డం మారుతికి రుచించ‌లేద‌ట‌. ఎలాగైనా ఆ సంస్థ‌లో ఓ భారీ హిట్టు కొట్టాల్సిందే అని కంక‌ణం క‌ట్టుకొని `భ‌లే భ‌లే మ‌గాడివోయ్‌` తీశాడ‌ట‌. ఆ విష‌యం గురించి నిన్న జ‌రిగిన స‌క్సెస్ మీట్‌ లో మాట్లాడాడు మారుతి.

ఎలాగైనా హిట్టు కొట్టే గీతాఆర్ట్స్ ఆఫీసులోకి అడుగు పెట్టాల‌నుకొన్నాన‌ని చెప్పుకొచ్చాడు మారుతి. `భ‌లే భ‌లే మ‌గాడివోయ్‌` ఊహించ‌నంత స్థాయిలో ఘ‌న విజ‌యం సాధించ‌డం ఎంతో ఆనందాన్నిచ్చింద‌ని, ద‌ర్శ‌కుడిగా ప్ర‌త్యేక‌మైన గౌర‌వాన్ని కూడా తెచ్చిపెట్టింద‌ని స్ప‌ష్టం చేశాడు మారుతి. `భ‌లే భ‌లే మ‌గాడివోయ్‌` ఇచ్చిన స్ఫూర్తితో ఇక నుంచి ఇలాంటి మంచి సినిమాలే చేస్తాన‌ని మారుతి మాటిచ్చాడు. తొలిరోజుల్లో ఆయన‌పై బూతు ముద్ర ఉండేది. యూత్‌ని ఆక‌ట్టుకోవ‌డానికే అన్న‌ట్టుగా పాత్ర‌ల‌తో ఏ స‌ర్టిఫికెట్ జోకులు వేయించేవాడు. దీంతో ఆయ‌న సినిమాల‌కి ఫ్యామిలీ ఆడియెన్స్ వెళ్ల‌డానికి భ‌య‌పడేవాళ్లు. కానీ `భ‌లే భ‌లే మగాడివోయ్‌` క్లీన్ సినిమాగా ప్రేక్ష‌కుల్ని ఆక‌ట్టుకుంటోంది. అందుకే మారుతి ఈ సినిమా నాకు గౌర‌వాన్ని తెచ్చిపెట్టిందంటున్నాడు. మంచి సినిమాలు తీస్తే మంచి ఫ‌లిత‌మే వ‌స్తుంద‌న్న విష‌యం మారుతికి తెలిసింది కాబ‌ట్టి ఇక నుంచి మంచి సినిమాలే తీస్తాడ‌న‌డంలో సందేహం లేదు.