మళ్ళీ.. మారుతితో వెంకీ టైఅప్‌

పరిమిత బడ్జెట్‌ సినిమాలు తెరకెక్కించి నిర్మాతలకు లాభాలు పండించే దర్శకుడిగా మారుతికి పేరుంది. యువతరాన్ని ఆకట్టుకునే ప్రేమకథల్ని తెరకెక్కిస్తూ పెట్టుబడికి తగ్గ రిటర్న్స్‌ అందిస్తున్నాడు. అందుకే ఎంతమంది స్టార్‌ డైరెక్టర్లు ఉన్నా తన ఉనికిని చాటుకుంటూనే ఉన్నాడు.

అయితే మారుతి ఇంతకాలం యువహీరోలతోనే పనిచేశాడు. ఓ స్టార్‌ హీరోని డైరెక్ట్‌ చేసింది లేనేలేదు. ఈసారి ఆ ఛాన్సొచ్చింది. విక్టరీ వెంకటేష్‌ హీరోగా ఓ సినిమాని తెరకెక్కించేందుకు సన్నాహాలు చేస్తున్నాడు. వెంకీ - మారుతి కాంబినేషన్‌ అనగానే ఓ ఫ్లాష్‌ బ్యాక్‌ గుర్తుకు రావాల్సిందే. అప్పట్లో వెంకటేష్‌ హీరోగా మారుతి 'రాధ' అనే చిత్రాన్ని తెరకెక్కించడానికి సన్నాహాలు సాగాయి. కానీ ఆ కథ నాది అంటూ వేరొక రచయిత అడ్డు చెప్పాడు. రచయితల సంఘంలో పంచాయితీ జరిగింది. దాంతో ప్రాజెక్టు వదులుకున్నారు.

అయినా మారుతి పట్టుదలగా వేరొక కథని రెడీ చేసుకుని వెంకీని కలిశాడు. ఈసారి కూడా కథ ఓకే అయ్యింది. ఈ కాంబినేషన్‌ లో త్వరలోనే కొత్త సినిమా సెట్స్‌ కి వెళ్లనుంది. రాధ సబ్జెక్టుకి దీనికి ఏమాత్రం సంబంధమే లేదని మారుతి చెబుతున్నాడు. ఆలోచించే దమ్ముంటే బోలెడన్ని కథలు. ఆల్‌ ది బెస్ట్‌ మారుతి.