మారుతి సినిమాతో మళ్లీ ఊపందుకునేనా?

గోపీచంద్ .. తెలుగు తెరపై యాక్షన్ హీరోగా ఎక్కువ మార్కులు కొట్టేసినవారి జాబితాలో ముందువరుసలో కనిపిస్తాడు. మంచి హైటూ .. అందుకు తగిన పర్సనాలిటీ గోపీచంద్ సొంతం. ఆయన తన బాడీ లాంగ్వేజ్ కి తగిన పాత్రలను ఎంచుకుంటూ వెళుతున్నాడు. పూర్తి యాక్షన్ హీరోగా ఉండిపోతే ఇబ్బందుల్లో పడిపోతామనే ఉద్దేశంతో ఆయన తన కథల్లో ఫ్యామిలీ ఆడియన్స్ కి నచ్చే అంశాలను పెంచుతూ వెళ్లాడు. అలా ఫ్యామిలీ ఆడియన్స్ ను కూడా థియేటర్స్ కి రప్పించగలిగాడు.

గోపీచంద్ డాన్సులు చేయలేడు .. కామెడీని పండించలేడు అనే విమర్శలు కెరియర్ తొలినాళ్లలో వచ్చాయి. దాంతో అందుకు తగిన కథలను ఎంచుకుని, ఆ విమర్శలను కూడా ఆయన తిప్పికొట్టాడు. ఇక ఇప్పుడు గోపీచంద్ అన్నీ చేయగలడు అని నిరూపించుకున్నాడు. కానీ విజయాలు మాత్రం ఆయనకి అందుబాటులోకి రావడం లేదు. ఆయన ఎలాంటి కథలను ఎంచుకున్నా .. వాటిలో ఎలాంటి అంశాలను జోడించినా సక్సెస్ మాత్రం ఆయనకి దూరంగానే ఉంటోంది.అయినా పట్టువదలని విక్రమార్కుడి మాదిరిగా ఆయన కొత్త కథలను వెతికి పట్టుకుంటూనే ఉన్నాడు.

ఆయన తాజా చిత్రంగా 'సీటీమార్' రూపొందింది. సంపత్ నంది దర్శకత్వం వహించిన ఈ సినిమాలో ఆయన కబడ్డీ కోచ్ గా కనిపించనున్నాడు. తమన్నా ఆయన జోడీగా అలరించనుంది. ఈ సినిమాను ఈ నెల 2వ తేదీన విడుదల చేయాలనుకున్నారుగానీ, కరోనా కారణంగా వెనక్కి వెళ్లింది. ఇక ప్రస్తుతం ఆయన మారుతి దర్శకత్వంలో 'పక్కా కమర్షియల్' చేస్తున్నాడు. ఇందులో ఆయన సరసన రాశి ఖన్నా నటిస్తోంది. గతంలో ఈ ఇద్దరి కాంబినేషన్లో వచ్చిన 'జిల్' హిట్ అయింది. అదే కాంబినేషన్లో వస్తున్న ఈ సినిమాతో గోపీచంద్ కెరియర్ ఊపందుకుంటుందనే నమ్మకంతో అభిమానులు ఉన్నారు. గోపీచంద్ కూడా ఆ రోజు కోసేమే ఎదురుచూస్తున్నాడు.