ఇక పెద్ద హీరోలపైనే మనోడి గురి

ఇంతకాలం పరిమిత వనరులతో, పరిమిత బడ్జెట్‌ తో చిన్నా చితకా సినిమాలు తీశాడు మారుతి. ఈరోజుల్లో, ప్రేమకథా చిత్రం, భలే భలే మగాడివోయ్‌ .. అతడి కెరీర్‌ లో చెప్పుకోదగ్గ హిట్లు. అయితే ఈ రోజుల్లో రిలీజైనప్పుడు బూతు డైరెక్టర్‌ అంటూ ముద్ర పడింది. దానిని చెరిపేస్తూ ఇప్పుడు భలే భలే మగాడివోయ్‌ చిత్రం తీశాడు. ఈ సినిమా ఇటీవలే రిలీజై ఇంటా బైటా రికార్డు విజయం సాధించింది. ఈ ఏడాది చిన్న సినిమాల్లోనే బ్లాక్‌ బస్టర్‌ హిట్‌ ఇది. ఈ సక్సెస్‌ తో.. ఇన్నేళ్ల పయనంలో మారుతి ఓ దర్శకుడిగా అన్ని కోణాల్లోనూ నిరూపించున్నట్టే.

ఇక అతడు కేవలం పెద్ద హీరోలపైనే దృష్టి సారిస్తాడనడంలో సందేహమే లేదు. ఇప్పటికే విక్టరీ వెంకటేష్‌ తో ఓ సినిమా చేసేందుకు సన్నద్ధంగా ఉన్నాడు. రాధ క్యాన్సిల్‌ అయినా మారుతిపై వెంకీ గురి తప్పలేదు. ఇప్పుడు ఎలానూ హిట్‌ కొట్టి ఉన్నాడు కాబట్టి ఈ ఇద్దరూ ఇక సెట్స్‌ కెళ్లడమే ఆలస్యం. అలాగే స్టార్‌ హీరోలు బన్ని, చరణ్‌, ఎన్టీఆర్‌, ప్రభాస్‌ అందరికీ స్క్రిప్టులు వినిపించే సత్తా ఇప్పుడు మారుతికి ఉంది. బన్ని ఎలానూ క్లోజ్‌ ఫ్రెండ్‌ కాబట్టి మారుతికి ఓ ఛాన్స్‌ షురూ.. అయితే మిగతా స్టార్‌ హీరోలు ఇప్పట్లో మారుతికి అందుబాటులోకి రారు.

హీరోలంతా స్టార్‌ డైరెక్టర్ల సినిమాలతో బిజీగా ఉన్నారు. వీళ్లంతా సినిమాలు పూర్తి చేసుకుని మారుతి కథ వినాలంటే చాలా టైమ్‌ పడుతుంది. వచ్చే ఏడాదిలోనే మారుతికి ఆ అవకాశం దక్కే ఛాన్సుంది. పెద్ద హీరోలే కావాలనుకుంటే అంతవరకూ మారుతి వేచి చూడాల్సిందే.