మల్టీ స్టారర్ ప్రాజెక్టులతో బిజీగా మాస్ మహారాజ్!

కోలీవుడ్లో తనకంటూ ఒక గుర్తింపు తెచ్చుకున్న హీరోగా విష్ణు విశాల్ కనిపిస్తాడు. అయితే స్టార్ హీరోల జాబితాలో కుదురుకోవడానికి ఆయన మరింత గట్టిగానే కృషి చేస్తున్నాడు. తమిళంలో ఇతర హీరోల మాదిరిగానే తాను కూడా అక్కడ చేసిన సినిమాలను తెలుగులో విడుదలయ్యేలా చూసుకుంటున్నాడు. అలాగే తెలుగు హీరోలతో సాన్నిహిత్యాన్ని పెంచుకుంటూ వెళుతున్నాడు. ఇప్పటికే రవితేజతో ఆయనకి మంచి స్నేహం ఉంది. ఇటీవల ఆయన చేసిన 'ఎఫ్ ఐ ఆర్' సినిమాకి తెలుగులో రవితేజ సమర్పకుడిగా వ్యవహరించాడు.

నిజానికి రవితేజ 'ఖిలాడి' విడుదలైన రోజునే .. ఆయన సమర్పించిన 'ఎఫ్ ఐ ఆర్' కూడా విడుదల కావడం విశేషం. సాధారణంగా అలా ఎవరూ ఒప్పుకోరు .. కానీ రవితేజ మాత్రం విష్ణు విశాల్ కి ఫుల్ సపోర్ట్ ఇచ్చాడు. అయితే విష్ణు విశాల్ గురించి ఇక్కడి ప్రేక్షకులకు పెద్దగా పరిచయం లేదు. ఇక్కడి ప్రేక్షకులు గుర్తుపెట్టుకునేంత గట్టి హిట్ ఆయన ఇవ్వలేదు. అందువలన 'ఎఫ్ ఐ ఆర్' సినిమాను ఎవరూ పెద్దగా పట్టించుకోలేదు. ఆ ఒక్క సినిమాకే రవితేజ - విష్ణు విశాల్ స్నేహం పరిమితమనుకుంటే పొరపాటే.

ఇప్పుడు విష్ణువిశాల్ చేస్తున్న ఒక సినిమాలో రవితేజ ఒక కీలకమైన పాత్రను చేయడానికి ఒప్పుకున్నట్టుగా తెలుస్తోంది. అంతేకాదు విష్ణు విశాల్ హీరోగా చేస్తూ ఈ సినిమాను నిర్మిస్తున్నాడు. ఈ సినిమా నిర్మాణంలో రవితేజ కూడా భాగస్వామి కావడం విశేషం.

'మట్టి కుస్తీ' టైటిల్ తో ఈ సినిమా రూపొందనుంది. స్పోర్ట్స్ నేపథ్యంలో ఈ కథ నడుస్తుంది. ఈ సినిమాకి చెల్లా అయ్యవు దర్శకుడు. కెరియర్ పరంగా విష్ణు విశాల్ కి ఇది 18వ సినిమా. తెలుగు .. తమిళ భాషల్లో ఈ సినిమాను విడుదల చేయనున్నారు. నిర్మాణంలోను .. యాక్టింగ్ లోను రవితేజ స్క్రీన్ షేర్ చేసుకోవడం విష్ణు విశాల్ కి కలిసొచ్చే అంశం.

ఇక రవితేజ చాలా బిజీ .. హీరోగా వరుస సినిమాలను పట్టాలెక్కిస్తూ ఉంటాడు. కెరియర్ ఆరంభంలో తప్ప ఆయన ఇతర హీరోల సినిమాల్లో కనిపించలేదు. సోలో హీరోగానే చేసుకుంటూ వెళుతున్నాడు. కానీ ఈ మధ్య ఆయన కాస్త రూట్ మార్చాడు.

చిరంజీవి - బాబీ సినిమాలో ఆయన ఒక ముఖ్యమైన పాత్రను చేయనున్నట్టుగా వార్తలు వస్తున్నాయి. అలాగే బాలకృష్ణ సినిమాలోను ఆయన అతిథి పాత్రలో మెరవనున్నట్టుగా చెప్పుకుంటున్నారు. ఇక తాజాగా విష్ణు విశాల్ తో సినిమాలో ఒక ప్రత్యేకమైన పాత్రలో కనిపించనున్నాడు. మరో వైపున నిర్మాతగాను రవితేజ స్పీడ్ పెంచుతుండటం విశేషం.