మాస్ వీర‌య్య గుట్టు లీక్.. క్రిమిన‌ల్స్ తో ఢీ అంటే ఢీ!

మెగాస్టార్ చిరంజీవి క‌థానాయ‌కుడిగా బాబీ దర్శకత్వంలో తెర‌కెక్కుతున్న మాస్ యాక్ష‌న్ చిత్రం 'వాల్తేరు వీర‌య్య'. 2023 సంక్రాంతి బ‌రిలో ఈ సినిమా అత్యంత క్రేజీగా విడుద‌ల‌వుతున్న సంగ‌తి తెలిసిందే. మాస్ మ‌హారాజా ర‌వితేజ ఇందులో ఓ కీల‌క పాత్ర‌ను పోషిస్తుండ‌గా శ్రుతిహాస‌న్ క‌థానాయిక‌గా న‌టిస్తోంది.

అయితే ఒక్కో పాత్ర గురించి హింట్ ఇచ్చిన బాబీ ఈ చిత్రంలో ప్ర‌ధాన విల‌న్ గా న‌టించేది ఎవ‌రు? అన్న‌ది మాత్రం చెప్ప‌నే లేదు. నిజానికి మెగాస్టార్ న‌టించిన గ్యాంగ్ లీడ‌ర్- రౌడీ అల్లుడు- కొండ‌వీటి దొంగ‌- జ‌గ‌దేక వీరుడు అతిలోక సుంద‌రి- ఇంద్ర లాంటి చిత్రాల్లో బ‌ల‌మైన విల‌నీ ఆయా సినిమాల ఘ‌న‌విజ‌యానికి స‌హ‌క‌రించాయి. మెగాస్టార్ ని ఢీకొట్టే విల‌న్ గా అమ్రిష్ పురి లాంటి బాలీవుడ్ న‌టుడు అద‌ర‌గొట్టారు. కొండ‌వీటి దొంగ‌- జ‌గ‌దేక వీరుడు అతిలోక సుంద‌రి చిత్రాల్లో అమ్రిష్ పురి బ‌ల‌మైన విల‌నీ గురించి బోలెడంత చ‌ర్చ సాగింది. కానీ ఇటీవ‌లి కాలంలో మ‌ళ్లీ అలాంటి క్యారెక్ట‌రైజేష‌న్ మెగా సినిమాల్లో మిస్స‌వుతోంద‌ని అభిమానులు విశ్లేషిస్తున్నారు.

అందుకే ఇప్పుడు బాబీ తెర‌కెక్కిస్తున్న 'వాల్తేరు వీర‌య్య' లాంటి భారీ మాస్ యాక్ష‌న్ చిత్రానికి బ‌ల‌మైన విల‌నీ అవ‌స‌ర‌మ‌ని అయితే ప్ర‌ధాన‌ విల‌న్ గా ఎవ‌ర‌ని ఎంపిక చేశారు? అన్న‌దే స‌స్పెన్స్ గా మారింద‌ని ఫ్యాన్స్ లో చ‌ర్చ సాగుతోంది. ఇప్ప‌టివ‌ర‌కూ వీర‌య్య‌ను నువ్వా నేనా? అంటూ ఢీకొట్టే విల‌న్ ఎవ‌రో బాబి టీమ్ రివీల్ చేయ‌క‌పోవ‌డ‌మే దీనికి కార‌ణం.

ఫిలింన‌గ‌ర్ వ‌ర్గాల లీకుల ప్ర‌కారం.. ఈ సినిమాలో వీర‌య్య అండ‌ర్ క‌వ‌ర్ కాప్ పాత్ర‌ధారి. ఇందులో విశాఖపట్నంలోని మాస్ ఏరియా వాల్తేరు ప‌రిస‌రాల్లో భయంకరమైన క్రైమ్ ని ఆపడానికి ప్ర‌య‌త్నించే అండ‌ర్ క‌వ‌ర్ పోలీస్ గా మెగాస్టార్ న‌టిస్తున్నార‌ని లీక్ అందింది. ఈ క‌థాంశానికి విశాఖ‌ప‌ట్నంతో పాటు శ్రీలంక బ్యాక్ డ్రాప్ ని జోడించార‌ని కూడా టాక్ ఉంది. ఇక‌ చిరంజీవి ఇందులో డ్యూయ‌ల్ షేడ్ ఉన్న పాత్ర‌తో అద‌ర‌గొట్ట‌బోతున్నారనేది గుస‌గుస‌.

మైత్రీ మూవీ మేకర్స్ నిర్మిస్తున్న ఈ చిత్రానికి దేవి శ్రీ ప్రసాద్ సంగీతం అందిస్తుండగా- ఆర్థర్ ఎ విల్సన్ సినిమాటోగ్రఫీ అందిస్తున్నారు. మెగాస్టార్ చిరంజీవి ఫస్ట్ లుక్ పోస్టర్ స‌హా టీజ‌ర్ వైర‌ల్ గా మారాయి. కానీ ఇప్ప‌టివ‌ర‌కూ విల‌న్ పాత్ర‌ధారి ఎవ‌రు? అన్న‌ది మాత్రం రివీల్ కాలేదు. బాబి సింహా స‌హా ఇత‌ర విల‌న్లు టీజ‌ర్ లో క‌నిపించినా ప్ర‌ధాన విల‌న్ పాత్ర‌ను మాత్రం రివీల్ చేయ‌క‌పోవ‌డంపై అభిమానుల్లో చ‌ర్చ సాగుతోంది. టీజ‌ర్ లో ఇద్ద‌రు ముగ్గురు విల‌న్లు ఉన్న‌ట్టు లీక్ ఇచ్చినా కానీ ప్ర‌ధాన విల‌న్ ని ప‌రిచ‌యం చేయ‌లేదు. మెగాస్టార్ ఈ సినిమాతో పాటు మెహర్ రమేష్ ద‌ర్శ‌క‌త్వంలో 'భోళా శంకర్' చిత్రంలో న‌టిస్తున్న సంగ‌తి తెలిసిందే. గాడ్ ఫాద‌ర్ ఘ‌న‌విజయం సాధించ‌డంతో చిరు రెట్టించిన ఉత్సాహంతో వ‌రుస‌గా సినిమాల్లో న‌టిస్తున్నారు.

సంక్రాంతి 2023 బ‌రిలోనే రిలీజ‌వుతున్న బాల‌కృష్ణ సినిమాలో కన్నడ న‌టుడు విజయ్ దునియా ప్ర‌ధాన విల‌న్ గా న‌టిస్తున్న సంగ‌తి తెలిసిందే. అత‌డి విల‌నీ ఈ చిత్రానికి ప్ర‌ధాన ఆక‌ర్ష‌ణ కానుంది. వీరయ్య టీజర్ లో ప్ర‌ధాన‌ ప్ర‌తినాయకుడి పాత్ర ఇంకా స‌స్పెన్స్ గానే ఉంది. ట్రైల‌ర్ వ‌చ్చే వ‌ర‌కూ విల‌న్ ఎవ‌ర‌న్న‌ది తెలీదేమో!


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.