మట్టి కుస్తీ ట్రైలర్: కామెడీ ఒక‌వైపు కుస్తీ మ‌రోవైపు..!

త‌మిళ స్టార్ హీరో విష్ణు విశాల్ న‌టించిన `గ‌ట్ట కుస్తీ` తెలుగులో `మ‌ట్టి కుస్తీ` పేరుతో విడుద‌ల‌వుతోంది. చెల్ల అయ్య‌వు ఈ చిత్రానికి ద‌ర్శ‌కుడు. ఆర్‌.టి టీమ్ వర్క్స్- విష్ణు విశాల్ స్టూడియోస్ బ్యానర్ లపై మాస్ మహారాజా రవితేజ స‌మ‌ర్ప‌ణ‌లో ఈ సినిమా విడుద‌ల‌వుతోంది. ఈ సినిమా తెలుగు ట్రైలర్ ఈరోజు విడుద‌లైంది.

తన గ్రామంలో జీవితాన్ని హాయిగా ఎంజాయ్ చేస్తున్న విష్ణు విశాల్ తన మామను పెళ్లాడేందుకు ప‌ద్ధ‌తైన అమ్మాయిని చూడమని అడుగుతాడు. కానీ కోరుకున్న‌దానికి విరుద్ధంగా జ‌ర‌గ‌డ‌మే అత‌డి విధి. వీధుల్లో రౌడీల‌ను ప‌రిగెత్తించి త‌న్నే ఐశ్వర్య లక్ష్మి తో అతగాడికి లంకె వేశాక ఏం జ‌రిగింది? అన్న‌ది తెర‌పైనే చూడాలి. తాజా ట్రైల‌ర్ లో కుస్తీలు ఒక‌వైపు కామెడీలు మ‌రోవైపు.. ఇందులోనే వేడెక్కించే రొమాన్స్ ఆద్యంతం ర‌క్తి క‌ట్టిస్తున్నాయి. రొమాంటిక్ యాంగిల్‌ని కొంత సరదాగా ట్రైలర్ లో చూపించారు. విష్ణు - ఐశ్వర్య వైవాహిక జీవితాన్ని ఎలా ఎదుర్కోవాలో వారి స్నేహితులు వివ‌రించే తీరు బోలెడంత ఫ‌న్ కురిపిస్తోంది. ఇక కుస్తీలు ప‌ట్టాలంటే కావాల్సింది క‌సి! అంటూ అదిరిపోయే పంచ్ లైన్ ల‌తో మూవీ గ్రిప్పింగ్ గానే తెర‌కెక్కింద‌ని అర్థ‌మ‌వుతోంది.

ఒక సామాన్య యువ‌కుడైన విష్ణు విశాల్ జీవితంలో ఎదురైన స‌వాల్ ని స్వీక‌రించి క‌సిగా రెజ్లింగ్ కోసం శిక్షణపై దృష్టి సారిస్తాడు. క్రీడాకారుడిగా అత‌డు అద్భుతంగా సూట‌య్యాడు. ట్రైలర్ మొత్తం క్రీడ -కామెడీ- శృంగారం మేళ‌వింపుతో ఆక‌ట్టుకుంది. మట్టి కుస్తి (తమిళంలో గట్ట కుస్తి)కి జస్టిన్ ప్రభాకరన్ సంగీతం అందించగా.. రిచర్డ్ ఎం నాథన్ కెమెరా వ‌ర్క్ అందించారు. ఈ చిత్రం డిసెంబర్ 2న తమిళం- తెలుగు భాషల్లో విడుదల కానుంది.