నిఖిల్ ను సత్కరించిన న్యూజెర్సీ ఎడిసన్ మేయర్..!

ఈ ఏడాది బాక్సాఫీస్ వద్ద బిగ్గెస్ట్ బ్లాక్ బస్టర్స్ గా నిలిచిన చిత్రాల్లో ''కార్తికేయ 2'' ఒకటి. యంగ్ హీరో నిఖిల్ సిద్ధార్థ్ - మరియు డైరక్టర్ చందూ మొండేటి కాంబినేషన్ లో ఈ మిస్టికల్ అడ్వెంచర్ థ్రిల్లర్‌ తెరకెక్కింది.

'కార్తికేయ 2' ఆగస్ట్ 13న ఎలాంటి అంచనాలు లేకుండా విడుదలై.. మంచి మౌత్ తో విజయవంతంగా నడిచింది. తెలుగుతో పాటుగా హిందీ, తమిళ, మలయాళ భాషల్లో అనూహ్య స్పందన తెచ్చుకుంది.

నార్త్ లో 'కార్తికేయ 2' సినిమా బాక్సాఫీస్ కలెక్షన్స్ ట్రేడ్ విశ్లేషకులను సైతం ఆశ్చర్యపరిచాయి. ఇటీవల ఓటీటీలోకి వచ్చిన ఈ చిత్రం.. డిజిటల్ వేదికపై వ్యూయర్ షిప్ లో సంచలనం సృష్టిస్తోంది.

'కార్తికేయ 2' సినిమా అగ్ర దర్శక హీరోలు - సినీ సెలబ్రిటీలు మరియు రాజకీయ నాయకుల నుండి ప్రశంసలు అందుకుంది. ఇస్కాన్ లేఖ - గుజరాత్ సీఎం - బిగ్ బీ అమితాబ్ బచ్చన్ - పవర్‌ స్టార్ పవన్ కళ్యాణ్ వంటి వారు కార్తికేయ టీమ్‌ ను అభినందించారు.

తాజాగా న్యూజెర్సీ ఎడిసన్ మేయర్ సామ్ జోషి 'కార్తికేయ 2' సినిమా యునైటెడ్ స్టేట్స్‌ లో అద్భుతమైన విజయం సాధించినందుకు గాను హీరో నిఖిల్ సిద్ధార్థను సత్కరించారు. తమ కార్యాలయం తరపున ప్రశంసా పత్రాన్ని అందజేశారు.

సామ్ జోషి మాట్లాడుతూ.. "అందరికీ నమస్కారం. మేము నిఖిల్‌ ని చిత్ర పరిశ్రమలో అతని అద్భుతమైన పనిని గుర్తించాలని కోరుకున్నాము. ఇటీవలి 'కార్తికేయ 2' చిత్రం అమెరికాలో మరియు భారతదేశంలో బ్లాక్‌ బస్టర్ హిట్ అయ్యింది. దీనికి మేము చాలా గర్వపడుతున్నాము. మేయర్ కార్యాలయం ద్వారా అతనికి ఒక ప్రశంసా పత్రాన్ని జారీ చేయాలనుకుంటున్నాము" అని అన్నారు.

దీనిపై నిఖిల్ స్పందిస్తూ.. "ఈ గౌరవానికి చాలా ధన్యవాదాలు సార్. ఇది ఎడిసన్ మేయర్ సామ్ జోషి సార్ నుండి వస్తుందని నేను చెప్పాలనుకుంటున్నాను. నాకు చాలా ఆనందంగా ఉంది" అని పేర్కొన్నారు. దీనికి సంబంధించిన ఫోటోలు వీడియోలు ఇప్పుడు సోషల్ మీడియాలో చక్కర్లు కొడుతున్నాయి.

కాగా, శ్రీ కృష్ణుడు - కృష్ణతత్వం - ద్వారక నగరం చుట్టూ అల్లుకున్న మిస్టరీల నేపథ్యంలో ''కార్తికేయ 2'' చిత్రాన్ని తెరకెక్కించారు. ఇది 2014 లో వచ్చిన 'కార్తికేయ' కు సీక్వెల్. నిఖిల్ సరసన అనుపమ పరమేశ్వరన్ హీరోయిన్ గా నటించింది. అనుపమ్ ఖేర్ - శ్రీనివాస రెడ్డి - ఆదిత్యా మీనన్ - వైవా హర్ష - తులసి తదితరులు ఇతర పాత్రల్లో నటించారు.

పీపుల్ మీడియా ఫ్యాక్టరీ మరియు అభిషేక్ అగర్వాల్ ఆర్ట్స్ బ్యానర్స్ పై టీజీ విశ్వప్రసాద్ - అభిషేక్ అగర్వాల్ ఈ చిత్రాన్ని నిర్మించారు. వివేక్ కూచిభోట్ల‌ సహ నిర్మాతగా వ్యవహరించారు. కాల భైరవ సంగీతం సమకూర్చగా.. కార్తీక్ ఘట్టమనేని సినిమాటోగ్రఫీ నిర్వహించారు.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.