మీకు మాత్రమే చెప్తా.. ఆ రోజు

'పెళ్ళిచూపులు' సినిమాతో డైరెక్టర్ గా ప్రేక్షకులను మెప్పించి.. యువ హీరో విజయ్ దేవరకొండకు ఫస్ట్ సోలో హిట్ అందించిన తరుణ్ భాస్కర్ ఇప్పుడు హీరోగా పరిచయం కానున్న సంగతి తెలిసిందే. ఈ సినిమాను విజయ్ దేవరకొండ కింగ్ ఆఫ్ ది హిల్ ఎంటర్టైన్మెంట్ బ్యానర్ పై నిర్మిస్తున్నాడు. ఇది నిర్మాతగా విజయ్ దేవరకొండకు తొలి చిత్రం. నూతన దర్శకుడు షామీర్ సుల్తాన్ ఈ సినిమాతో టాలీవుడ్ కు పరిచయం అవుతున్నాడు.

ఈ న్యూ ఏజ్ సినిమాను అక్టోబర్ 18 న రిలీజ్ చేయాలని నిర్మాతలు నిర్ణయించారు. అక్టోబర్ 24 న పలు సినిమాలు రిలీజ్ అవుతున్నాయి. ప్రస్తుతానికైతే అక్టోబర్ 18 డేట్ కు పెద్దగా పోటీ లేదని సమాచారం. ఈ సినిమా థియేట్రికల్ రైట్స్ చాలారోజుల క్రితమే ఏషియన్ సునీల్ సొంతం చేసుకున్న సంగతి తెలిసిందే. ఈ డీల్ తోనే విజయ్ దేవరకొండకు ఈ సినిమాపై పెట్టిన పెట్టుబడి వెనక్కు వచ్చిందని సమాచారం. సినిమా నాన్ థియేట్రికల్ రైట్స్ మీద వచ్చేదంతా లాభమేనట. తక్కువ బడ్జెట్ తో సినిమాను తెరకెక్కించారు కాబట్టి ఏషియన్ సునీల్ కు రికవరీ పెద్ద కష్టం కాబోదని అంటున్నారు.

ఇక సినిమా ప్రమోషన్స్ విషయానికి వస్తే 'మీకు మాత్రమే చెప్తా' టీజర్.. ఫస్ట్ సాంగ్ రిలీజ్ అయ్యాయి. టీజర్ కు యూత్ లో మంచి స్పందనే దక్కింది కానీ సాంగ్ కు పెద్దగా రెస్పాన్స్ రాలేదు. సినిమా రిలీజ్ డేట్ ఎలాగూ లాక్ అయింది కాబట్టి ఇక ఇంట్రెస్టింగ్ ప్రోమోస్ తో 'మీకు మాత్రమే చెప్తా' టీమ్ హంగామా చేయడం ఖాయం. విజయ్ దేవరకొండ ప్రమోషన్ స్ట్రేటజీలు కొత్తగా ఉంటాయి కాబట్టి ఈ సినిమాకు కూడా ఇంట్రెస్టింగ్ ప్రమోషన్స్ చేపట్టే అవకాశాన్ని తోసిపుచ్చలేం.