మెగా ఫ్యామిలీ.. రైటర్స్ ఫెయిలా??

టాలీవుడ్ లో ఇప్పుడు మెగా కుటుంబం నుంచి అరడజన్ మంది హీరోలు ఉన్నారు. మెగాస్టార్ చిరంజీవి కూడా మళ్లీ సినిమాలు మొదలుపెట్టేశారు. మరి ఇంతమంది హీరోలు ఉన్న ఈ కుటుంబానికి.. తెలుగు కథలు మాత్రం దొరకడం లేదు. అందరూ రీమేకుల పైనే దృష్టి పెట్టారు.

మెగాస్టార్ చిరంజీవి కోలీవుడ్ మూవీ కత్తిని రీమేక్ చేస్తున్న విషయం తెలిసిందే. పవర్ స్టార్ పవన్ కళ్యాణ్ చేస్తున్న కొత్త సినిమా కూడా.. తమిళ్ స్టార్ హీరో నటించిన వేదాళంకు రీమేక్ అనే ప్రచారం జరుగుతోంది. పూర్తిగా కాకపోయినా.. థీమ్ ను ఆ సినిమా నుంచే తీసుకున్నారని అంటున్నారు. ఇక రామ్ చరణ్ అయితే.. గతేడాది తమిళ బ్లాక్ బస్టర్ మూవీ తని ఒరువన్ ని ధృవగా రీమేక్ చేస్తున్నాడు. ఇప్పుడు మెగాడాటర్ నీహారిక కూడా మరాఠీ మూవీ హ్యాపీ జర్నీలో నటించనుందనే వార్తలు వస్తున్నాయి.

స్టైలిష్ స్టార్ అల్లు అర్జున్ - వరుణ్ తేజ్ - సాయి ధరంతేజ్ - అల్లు శిరీష్ లు స్ట్రైట్ సినిమాలే చేస్తున్నా.. ఇందులో అల్లు అర్జున్ ఒక్కడే స్టార్. ఒకే ఫ్యామిలీలో ఏడుగురు హీరోలు.. అందులో నలుగురు స్టార్స్ ఉంటే.. ముగ్గురు రీమేక్ లే చేస్తుండడం గమనించాలి. మెగా ఫ్యామిలీకి కథలు చెప్పి మెప్పించడంలో రైటర్స్ ఫెయిల్ అవుతున్నారో.. తెలుగు కథలు వారికి నచ్చడం లేదో ఆలోచించాల్సిన విషయమే.