మెగా ఫ్యాన్స్‌ ఒప్పుకుంటారా?

నానీ హీరోగా చేస్తూనే... మ‌రో వైపు నిర్మాత అవ‌తారం ఎత్తాడు. తొలిసారి అ అనే సినిమాను నిర్మించాడు. ఆ సినిమా ఈరోజే ధియేట‌ర్ల‌లోకి వ‌చ్చి... చాలా డిఫ‌రెంట్ సినిమా అనే పేరు తెచ్చుకుంది. రొటీన్ భిన్నంగా ఉన్న సినిమా... భారీ తారాగ‌ణం కూడా ఉండ‌డంతో... ప్ర‌స్తుతం తెలిసిన స‌మాచారం మేర‌కు విదేశాల్లో బాగానే ఉంద‌న్న టాక్ వ‌చ్చింది. కాగా నానీకి చిరంజీవి సినిమాల్లో ఒక సినిమాను రీమేక్ చేయాల‌న్న కోరిక ఉంది. అందుకు మెగా అభిమానులు ఒప్పుకుంటారా అన్న సందేహం వ‌చ్చింది సినీ జ‌నాలకు.

సాయిధ‌ర‌మ్ తేజ్ చిరుకు స్వ‌యానా మేన‌ల్లుడు. అత‌ను వీలున్న‌ప్పుడ‌ల్లా చిరు సూప‌ర్ హిట్ సాంగ్స్‌ ను రీమేక్ చేసి త‌న సినిమాలో వాడుతుంటారు. సుప్రీమ్‌ లో అందం హిందోళం పాట రీమిక్స్ సూప‌ర్ హిట్ కొట్టింది. అంత‌కు ముందు సుబ్ర‌హ్మ‌ణ్యం ఫ‌ర్ సేల్ లో గువ్వా గోరింక‌తో... పాట‌ను వాడాడు. మొన్న‌నే విడుద‌లైన ఇంటెలిజెంట్ లోనూ కొండ‌వీటి దొంగ సినిమాలోని చ‌మ‌కు చ‌మ‌కు చామ్‌... పాట రీమిక్స్ చేసి పెట్టాడు. ఇలా హిట్ సాంగ్‌ ల‌న్నీ తేజూ వాడేస్తుంటే... మెగా అభిమానులు కొంద‌రు ఏడ్చుకుంటున్నారు. ఆ ఫ్యామిలీకి చెందిన వ్య‌క్తే చిరు పాట‌లు వాడుతుంటే... ఇంత‌లా బాధ‌ప‌డుతున్నారు మెగా ఫ్యాన్స్. మ‌రి ఆ కుటుంబంతో ఎలాంటి సంబంధంలేని నానీ చిరు సినిమాను రీమేక్ చేస్తానంటే వాళ్ల ఫీలింగ్ ఏమిటో?

చిరంజీవి జంధ్యాల గారి ద‌ర్శ‌క‌త్వంలో చంట‌బ్బాయి అనే సినిమాలో న‌టించాడు. ఈ సినిమా కామెడీ పండించింది. దానినే మ‌ళ్లీ రీమేక్ చేయాల‌న్న ఆలోచ‌న‌తో ఉన్నాడ‌ట నాని. మ‌రి ఆ సినిమాకు నిర్మాత‌గా ఉంటాడో - లేక తానే న‌టిస్తాడో మాత్రం తెలియ‌దు. ఆ రెండు పాత్ర‌లు పోషించినా ఆశ్చ‌ర్యం లేదు. ప్ర‌స్తుతం నాని క్రిష్ణార్జున యుద్ధంలో న‌టిస్తున్నాడు.