మెగా అభిమానుల్లో టెన్షన్.. ఎమోషన్

ఎన్నేళ్లుగానో ఎదురు చూస్తున్న సినిమా ముస్తాబవుతోంది. మెగాస్టార్ చిరంజీవి రీఎంట్రీ మూవీ షూటింగ్ చకచకా జరిగిపోతోంది. ఇప్పటికే 40 శాతం షూటింగ్ పూర్తయినట్లు సమాచారం. మొదలుపెట్టిన రోజు నుంచి నిర్విరామంగా షూటింగ్‌లో పాల్గొంటున్నాడు చిరు. ఈ సినిమాలో చిరు లుక్ ఎలా ఉంటుందో అభిమానులకు పరిచయం చేయడానికి మంచి ముహూర్తం కూడా కుదిరింది. ఈ సోమవారమే చిరంజీవి పుట్టిన రోజు. ఆ రోజే చిరు ఫస్ట్ లుక్ పోస్టర్ రిలీజ్ చేయబోతున్నట్లు అఫీషియల్‌ గానే సమాచారం ఇచ్చారు. ఆ లుక్ చూసేందుకు ఇంకో నాలుగు రోజులు మాత్రమే సమయం ఉండటంతో అభిమానుల్లో కౌంట్ డౌన్ మొదలైపోయింది.

తొమ్మిదేళ్ల విరామం తర్వాత చిరు తెరమీద ఎలా కనిపిస్తాడో అన్న ఉత్కంఠ అభిమానుల్ని ఊపేస్తోంది. ఈ సినిమా టైటిల్ విషయంలోనూ సస్పెన్స్ కొనసాగుతున్న నేపథ్యంలో ఈ నెల 22న ఫస్ట్ లుక్ పోస్టర్ మీద ఏం పేరు ఉంటుందో అని కూడా ఉత్కంఠతో ఉన్నారు ఫ్యాన్స్. ఇప్పటికే సినిమా రెగ్యులర్ షూటింగ్ మొదలైన రోజు చిరు లుక్ చూసి అభిమానులు సంతోషం పట్టలేకపోయారు. ఇక ఫస్ట్ లుక్ పోస్టర్ ఎలా ఉంటుందో చూడాలి. ఫస్ట్ లుక్ రిలీజ్ కోసమని ఒక టీమే పని చేస్తోంది కొన్ని రోజులుగా. అనిల్-భాను ఈ పోస్టర్ తయారు చేస్తున్నారు. మరి చిరు తన పుట్టిన రోజు నాడు అభిమానులకు ఎలాంటి అనుభూతినిస్తాడో చూద్దాం.