మాస్ మహారాజా సినిమాలో మెగా హీరో...?

మాస్ మహారాజా రవితేజ - డైరెక్టర్ త్రినాథరావు నక్కిన కాంబినేషన్ లో ఒక చిత్రం తెరకెక్కనున్నదని గత కొన్ని రోజులుగా వార్తలు వస్తున్న విషయం తెలిసిందే. 'సినిమా చూపిస్తా మావా' 'నేను లోకల్' వంటి సినిమాలతో మంచి విజయాలు అందుకున్న త్రినాథరావు నక్కిన చెప్పిన స్టోరీ రవితేజకు నచ్చిందట. ప్రస్తుతం ఈ మూవీకి సంబంధించిన ప్రీ ప్రొడక్షన్ పనులు జరుగుతున్నాయని సమాచారం. అయితే ఈ సినిమాలో ఒక ఇంపార్టెంట్ రోల్ ఉండబోతోందట. ఆ క్యారెక్టర్ కోసం మెగా హీరో సాయి ధరమ్‌ తేజ్‌ పేరును చిత్ర యూనిట్ పరిశీలిస్తున్నారట. సినిమాలో సుమారు 20 నిమిషాల నిడివి గల ఈ పాత్రకు తేజ్ అయితే కరెక్ట్‌ గా సరిపోతాడని దర్శకనిర్మాతలు భావిస్తున్నట్లు సమాచారం. దీనికి సంబంధించి ఇప్పటికే తేజ్ తో సంప్రదింపులు జరుపుతున్నట్లు కూడా టాక్‌ వినిపిస్తోంది. కాకపోతే రెండు వరుస సక్సెస్ లతో ఊపు మీదున్న సాయి ధరమ్ తేజ్ ఇలాంటి పాత్రలలో నటించడానికి ఒప్పుకుంటాడా అనేది డౌటే. మరి ఇందులో నిజమెంతో తెలియాలంటే కొద్ది రోజులు ఆగాల్సిందే.

ఇదిలా ఉండగా రవితేజ ప్రస్తుతం 'క్రాక్' సినిమాలో నటిస్తున్న విషయం తెలిసిందే. తన కెరీర్ లో 66వ చిత్రంగా తెరకెక్కుతున్న ఈ మూవీకి గోపీచంద్ మలినేని దర్శకత్వం వహిస్తున్నాడు. రవితేజ పవర్‌ ఫుల్ పోలీస్ పాత్రలో కనిపించనున్న ఈ సినిమాలో శృతిహాసన్ - వరలక్ష్మీ శరత్ కుమార్ ప్రధాన పాత్రల్లో నటిస్తున్నారు. రవితేజ - గోపిచంద్‌ మలినేనిల కాంబినేషన్ లో ఇంతకముందు వచ్చిన 'డాన్‌ శీను' 'బలుపు' చిత్రాలు మంచి విజయాలను సొంతం చేసుకున్నాయి. ఇప్పుడు 'క్రాక్' సినిమాతో హ్యాట్రిక్‌ హిట్ కోసం రెడీ అవుతున్నారు. ఇప్పటికే విడుదలైన సినిమా పోస్టర్స్ అంచనాలను పెంచేసింది. మేజర్ పార్ట్ షూటింగ్ జరుపుకున్న 'క్రాక్' చిత్రాన్ని ఈ ఏడాది స‌మ్మ‌ర్ లో సినిమాను విడుద‌ల చేయాల‌ని అనుకున్నారు. కానీ కరోనా కారణంగా షూటింగ్ వాయిదా పడింది. కొన్ని వాస్తవ ఘటనలను ఆధారంగా చేసుకొని తెరకెక్కిస్తున్న ఈ చిత్రాన్ని సరస్వతి ఫిల్మ్ డివిజన్ ప్రొడక్షన్స్ లో ఠాగూర్ మధు నిర్మిస్తున్నాడు. థమన్ ఈ సినిమాకి మ్యూజిక్ అందిస్తున్నాడు.