మళ్ళీ వార్తల్లోకి మెగా హీరో పెళ్లి..!

టాలీవుడ్ మోస్ట్ ఎలిజిబుల్ బ్యాచిలర్స్ అందరూ ఈ మధ్య ఒక్కొక్కరుగా పెళ్లి పీటలు ఎక్కుతున్న నేపథ్యంలో మెగా మేనల్లుడు సాయి తేజ్ పెళ్లి చేసుకోబోతున్నాడనే వార్తలు వచ్చిన సంగతి తెలిసిందే. అయితే ఆ మధ్య ఓ ఇంటర్వ్యూలో తేజ్ మాట్లాడుతూ తను సింగిల్‌ అనే విషయాన్ని వెల్లడించాడు. 'నేను సింగిలే కానీ ఇంట్లో పెళ్లి కోసం ప్లాన్ చేస్తున్నారు.. నిహారిక పెళ్లి తరువాత నాపై ఒత్తిడి ఎక్కువైంది' అని పేర్కొన్నాడు తేజ్. ఈ నేపథ్యంలో ఇప్పుడు మరోసారి మెగా మేనల్లుడి పెళ్లి చేసుకోబోతున్నాడనే వార్త చక్కర్లు కొడుతోంది.

సాయి తేజ్ త్వరలో ఓ ఇంటివాడు కాబోతున్నాడట. రాబోయే మే నెలలో తేజ్ పెళ్లి జరగబోతుందని.. మెగా ఫ్యామిలీ ఇప్పటికే అమ్మాయిని కూడా సెలెక్ట్ చేశారని అనుకుంటున్నారు. తమ దగ్గరి బంధువుల అమ్మాయితో తేజ్ వివాహం జరిపించనున్నారట. ఇందులో నిజమెంతో తెలియాలంటే మెగా ఫ్యామిలీ నుంచి అధికారిక ప్రకటన వచ్చే వరకు ఆగాల్సిందే. ఇదిలావుండగా సాయి తేజ్ ప్రస్తుతం తన కెరీర్‌ పై దృష్టి పెట్టి వరుస సినిమాలు చేస్తూ వస్తున్నాడు. దేవకట్టా దర్శకత్వంలో 'రిపబ్లిక్' అనే సినిమా చేస్తున్న తేజ్.. దీని తర్వాత కార్తీక్ దండుతో ఓ మిస్టికల్ థ్రిల్లర్ లో నటించనున్నాడు.