రెండున్నర గంటల నిడివితో వస్తున్న మెగా మేనల్లుడి 'ఉప్పెన'

మెగాస్టార్ మేనల్లుడు, సుప్రీమ్ హీరో సాయి తేజ్ తమ్ముడు వైష్ణవ్ తేజ్ హీరోగా పరిచయం అవుతోన్న చిత్రం ‘ఉప్పెన’. బుచ్చిబాబు సానా ఈ చిత్రంతో దర్శకుడిగా పరిచయం అవుతున్నాడు. సుకుమార్ రైటింగ్స్‌ తో కలిసి మైత్రీ మూవీ మేకర్స్ బ్యానర్‌ పై నవీన్ యెర్నేని - వై.రవిశంకర్ నిర్మించారు. వైష్ణవ్ తేజ్ సరసన కృతిశెట్టి హీరోయిన్‌గా నటించారు. తమిళ స్టార్ యాక్టర్ విజయ్ సేతుపతి ఇందులో కీలక పాత్ర పోషించారు. ఈ సినిమా ఫిబ్రవరి 12న ప్రపంచ వ్యాప్తంగా విడులవుతోంది. ఈ నేపథ్యంలో 'ఉప్పెన' సెన్సార్ కార్యక్రమాలు పూర్తి చేసుకున్నట్లు తెలుస్తోంది.

'ఉప్పెన' చిత్రానికి 2 గంటల 27 నిమిషాల నిడివితో 'యూ/ఏ' సెన్సార్ సర్టిఫికేట్ దక్కినట్లు చిత్ర యూనిట్ తెలిపింది. ఇకపోతే ఇప్పటికే ఈ చిత్రానికి సంబంధించిన ట్రైలర్ - సాంగ్స్ మంచి రెస్పాన్స్ తెచ్చుకున్నాయి. దీంతో వైష్ణవ్ తేజ్‌ కు తొలి సినిమానే అయినా ప్రీ రిలీజ్ బిజినెస్ మాత్రం బాగా జరిగిందని ట్రేడ్ వర్గాలు చెబుతున్నాయి. ఈ చిత్రానికి రాక్ స్టార్ దేవిశ్రీ ప్రసాద్ సంగీతం సమకూర్చారు. శ్యామ్ దత్ సైనుద్దీన్ సినిమాటోగ్రాఫర్ గా వ్యవహరించగా.. నవీన్ నూలి ఎడిటింగ్ వర్క్ చేశారు. సుమారు రెండున్నర గంటల నిడివితో ప్రేమికుల దినోత్సవం సందర్భంగా వస్తున్న 'ఉప్పెన' ప్రేక్షకులకు ఎలాంటి అనుభూతిని అందిస్తుందో చూడాలి.