పిక్ టాక్: మెగా పవర్ స్టార్ సెల్ఫీ విత్ మెగా ఫ్యాన్స్..!

మెగాస్టార్ చిరంజీవి నట వారసుడిగా 'చిరుత'గా ఇండస్ట్రీలో అడుగుపెట్టాడు రామ్ చరణ్. 'మగధీర' సినిమాతో అప్పటి రికార్డులన్నింటినీ తిరగరాసి మెగా పవర్ స్టార్ అనిపించుకున్నాడు. తండ్రి సపోర్ట్ తో వచ్చినప్పటికీ.. సినిమా కోసం కష్టపడుతూ ఒక్కో మెట్టు ఎక్కుతూ నటుడిగా తనకంటూ ప్రత్యేక గుర్తింపు తెచ్చుకున్నాడు. చరణ్ రేపు శనివారం 36వ ఏట అడుగుపెట్టబోతున్నాడు. ఈ నేపథ్యంలో మెగా ఫ్యాన్స్ రెండు రోజుల ముందు నుంచే సంబరాలు స్టార్ట్ చేశారు.

రేపు రామ్‌ చరణ్ పుట్టినరోజు సందర్భంగా ఆయన్ని పలకరించడానికి పెద్ద ఎత్తున అభిమానులు తరలి వచ్చారు. ఈ నేపథ్యంలో వారితో చరణ్ ఓ సెల్ఫీ తీసుకొని మెగా ఫ్యాన్స్ ని ఖుషీ చేసాడు. ప్రస్తుతం ఈ మెగా సెల్ఫీ సోషల్ మీడియాలో వైరల్ అవుతోంది. ఇకపోతే చరణ్ బర్త్ డే సందర్భంగా కామన్ డిస్ప్లే పిక్చర్ మరియు స్పెషల్ మోషన్ పోస్టర్ ని విడుదల చేసారు. కామన్‌ డీపీ పెద్దగా ఆకర్షించలేదని విమర్శలు వచ్చినప్పటికీ.. గుర్రంపై స్వారీ చేస్తూ నిప్పుల మధ్యలో చరణ్ వచ్చేలా డిజైన్ చేసిన మోషన్ పోస్టర్ కి మెగా ఫ్యాన్స్ ఫిదా అవుతున్నారు. వీరి ఆనందాన్ని రెట్టింపు చేయడానికి ఈరోజు సాయంత్రం 4 గంటలకు 'ఆర్.ఆర్.ఆర్' నుంచి బర్త్ డే ట్రీట్ రానుంది.