ఆకాశ‌మే హ‌ద్దుగా మెగా ప‌వ‌ర్ స్టార్ ప్లానింగ్!

``కొడితే కుంభాన్నే కొట్టాలి. అంద‌రిలా రొటీన్ గా ఆలోచిస్తే పోటీలో వెన‌క‌బ‌డిపోవ‌డం ఖాయం. గుంపులో ఒక‌డిగా కాదు.. గుంపును న‌డిపించే నాయ‌కుడిలా ఉండాలి..``.. చూస్తుంటే రామ్ చ‌రణ్ ప్లానింగ్ ఆ రేంజులోనే ఉంది. ప్ర‌స్తుత పోటీ ప్ర‌పంచంలో త‌న స్థానాన్ని మ‌రో మెట్టు ఎక్కించేందుకు చ‌ర‌ణ్ పడుతున్న త‌ప‌న ఆశ్చ‌ర్య‌ప‌రుస్తోంది.

వ‌రుస‌గా బ్యాక్ టు బ్యాక్ పాన్ ఇండియా డైరెక్ట‌ర్ల‌కు మాత్ర‌మే గాలం వేస్తున్న రామ్ చ‌ర‌ణ్ త‌న త‌దుప‌రి చిత్రాల‌తో ఇండియా లెవ‌ల్లో స‌రికొత్త చ‌రిత్ర‌కు శ్రీ‌కారం చుట్టాల‌ని ప్లాన్ చేస్తున్న‌ట్టే క‌నిపిస్తోంది. ఇప్ప‌టికే ద‌ర్శ‌క‌ధీరుడు ఎస్.ఎస్.రాజ‌మౌళితో ఆర్.ఆర్.ఆర్ లాంటి పాన్ ఇండియా సినిమాలో న‌టిస్తున్న చ‌ర‌ణ్ .. త‌దుప‌రి శంక‌ర్ లాంటి స్టార్ డైరెక్ట‌ర్ ని బ‌రిలో దించేయ‌డం నిజంగానే ఆశ్చ‌ర్య‌ప‌రిచింది. చెర్రీ ప్లానింగ్ ఆ రేంజులో ఉంద‌ని అప్పుడే అంద‌రికీ అర్థ‌మైంది.

ఇటీవ‌లే శంక‌ర్ తో చెర్రీ సినిమాని ప్ర‌క‌టించాక ప‌నుల్లో వేగం కూడా ఆ రేంజులోనే ఉందిట‌. తాజా స‌మాచారం మేర‌కు.. శంకర్ చిత్రం కోసం చెన్నైలో ఒక కార్యాలయాన్ని తెరిచార‌ని తెలిసింది. ఇక‌పై పూర్తిగా శంక‌ర్ ఈ సినిమా కోసం మాత్ర‌మే ప‌ని చేసేలా నిర్మాత దిల్ రాజు ముకుతాడు వేస్తున్నార‌ట‌.

ఈ ఆఫీస్ లోనే ఇక‌పై శంక‌ర్ తో దిల్ రాజు- చ‌ర‌ణ్ క‌థా చ‌ర్చ‌లు సాగిస్తార‌ని తెలిసింది. ప్ర‌స్తుతం ప్రీ-ప్రొడక్షన్ పనులు పూర్తి స్థాయిలో శ‌ర‌వేగంగా పూర్త‌వుతున్నాయి. ఈ పాన్ ఇండియా సినిమా చ‌ర‌ణ్ కి.. దిల్ రాజుకు కూడా డ్రీమ్ ప్రాజెక్ట్. బ‌హుశా ఇండియా లెవ‌ల్లోనే ఇంత‌వ‌ర‌కూ ఇలాంటిది మ‌రొక‌టి లేదు అనేంత విజువ‌ల్ వండ‌ర్ ని తెర‌కెక్కించేందుకు.. దిల్ రాజు భారీ ప్లానింగ్ తో ముందుకు సాగుతున్న‌ట్టు తెలుస్తోంది. బ‌డ్జెట్ల ప‌రంగా రాజీకి రాకుండా శంక‌ర్ ఆశించినది రెడీ చేసేందుకు ఆయ‌న ప్లాన్ చేస్తున్నార‌ట‌.