యాక్షన్ సీన్ తో మెగా రీమేక్ షూటింగ్ షురూ..!

మెగాస్టార్ చిరంజీవి - దర్శకుడు మోహన్‌ రాజా కాంబినేషన్ లో ఓ సినిమా తెరకెక్కనున్న సంగతి తెలిసిందే. ఇది మలయాళ బ్లాక్ బస్టర్ 'లూసిఫర్' చిత్రానికి తెలుగు రీమేక్. #Chiru153 అనే వర్కింగ్ టైటిల్ తో ప్రీ ప్రొడక్షన్ వర్క్స్ జరుపుకున్న ఈ సినిమా షూటింగ్ ఈరోజు శుక్రవారం ప్రారంభమైంది. ప్రత్యేకంగా వేసిన సెట్ లో అదిరే యాక్షన్ సీన్ తో ఈ మూవీ చిత్రీకరణ మొదలు పెట్టినట్లు తెలుస్తోంది.

చిరంజీవి 153వ సినిమా షూటింగ్ స్టార్ట్ చేసినట్లు డైరెక్టర్ మోహన్‌ రాజా సోషల్ మీడియా వేదికగా వెల్లడించారు. 'నా తల్లిదండ్రులు, స్నేహితులు, శ్రేయోభిలాషుల ఆశీస్సులతో మరో ప్రయాణం మొదలైంది. మెగా మూవీ కోసం అమేజింగ్ టీమ్ తో కలిసి వర్క్ చేస్తున్నాం' అని ట్వీట్ చేసిన మోహన్‌.. సెట్స్ లో తీసుకున్న ఓ ఫోటోని షేర్ చేశారు.

ఇందులో డైరెక్టర్ తో పాటుగా #Chiru153 సినిమాటోగ్రాఫర్ నిరవ్‌ షా - ఆర్ట్ డైరెక్టర్ సురేశ్ సెల్వరాజన్‌ - స్టంట్‌ మాస్టర్ సిల్వ కనిపిస్తున్నారు. దీన్ని బట్టి చూస్తే యాక్షన్‌ సీక్వెన్స్ తోనే ఈ సినిమా షూటింగ్ స్టార్ట్ అయినట్లు తెలుస్తోంది. ఈ చిత్రానికి ఎస్.ఎస్ థమన్ సంగీతం సమకూరుస్తున్నారు. ఇప్పటికే ఓ సాంగ్ రికార్డింగ్ పూర్తి చేసినట్లు స్వయంగా వెల్లడించారు. కొణిదెల సురేఖ సమర్పణలో కొణిదెల ప్రొడక్షన్స్ - సూపర్ గుడ్ ఫిలిమ్స్ - ఎన్వీఆర్ సినిమా సంస్థలు కలిసి సంయుక్తంగా నిర్మిస్తున్నాయి.

పొలిటికల్ యాక్షన్ థ్రిల్లర్ గా తెరకెక్కుతోన్న ఈ చిత్రానికి ''గాడ్ ఫాదర్'' అనే టైటిల్ ను ఖరారు చేసినట్లు వార్తలు వస్తున్నాయి. ఈ మెగా రీమేక్ కు సంబంధించిన మరిన్ని వివరాలు త్వరలోనే వెల్లడికానున్నాయి. ఇదిలా ఉండగా కొరటాల శివ దర్శకత్వంలో చిరంజీవి - రామ్ చరణ్ కలిసి నటిస్తున్న ''ఆచార్య'' సినిమా ఫైనల్ స్టేజీకి వచ్చేసింది. రెండు పాటలు మినహా చిత్రీకరణ మొత్తం పూర్తి చేశారు. త్వరలోనే విడుదల తేదీని ప్రకటించే అవకాశం ఉంది.

'ఆచార్య' చిత్రాన్ని సంక్రాంతి బరిలో నిలపనున్నారని ఫిలిం సర్కిల్స్ లో టాక్ వినిపిస్తోంది. ఇప్పటికే మూడు పెద్ద సినిమాలు పండక్కి వస్తుండటంతో ఒక వారం గ్యాప్ తో జనవరిలోనే ఈ చిత్రాన్ని విడుదల చేయాలని మేకర్స్ భావిస్తున్నారట. పరిస్థితులను బట్టి మెగాస్టార్ బర్త్ డే స్పెషల్ గా రిలీజ్ డేట్ ని ప్రకటించే అవకాశం ఉందని ఇన్ సైడ్ టాక్.