భీష్మా దర్శకుడితో మెగాహీరో..?

ఈ మధ్యకాలంలో టాలీవుడ్ ఇండస్ట్రీలో యువదర్శకులు సూపర్ హిట్స్ అందుకుంటున్నారు. ఈ రెండేళ్లలోనే చాలామంది నూతన దర్శకులు ఇండస్ట్రీకి పరిచయం అవ్వడమే కాకుండా మంచి హిట్స్ కూడా ఖాతాలో వేసుకున్నారు. అలా రావడంతోనే హిట్స్ తో వారి సత్తా ప్రూవ్ చేసుకొని స్టార్ హీరోలతో సినిమాలు చేసేస్తున్నారు. ఉదాహరణగా రాధేశ్యామ్ ఫేమ్ రాధాకృష్ణకుమార్.. జిల్ అనే ఒకే హిట్ సినిమాతో పరిచయమై సెకండ్ మూవీ ఏకంగా పాన్ ఇండియా స్థాయిలో ప్రభాస్ తో తెరకెక్కిస్తున్నాడు. అదేవిధంగా డైరెక్టర్ సుజిత్ కూడా రన్ రాజా రన్ హిట్ తర్వాత సాహో లాంటి పాన్ ఇండియా మూవీ తెరపైకి తీసుకొచ్చాడు.

అలా యువదర్శకులు ఇండస్ట్రీలో తమ మార్క్ క్రియేట్ చేసుకుంటున్నారు. తాజాగా అదేబాటలో వెళుతున్నాడు యంగ్ డైరెక్టర్ వెంకీ కుడుముల. ఛలో సినిమాతో ఇండస్ట్రీలో దర్శకుడిగా అడుగు పెట్టిన వెంకీ డెబ్యూ మూవీతోనే సూపర్ హిట్ అందుకున్నాడు. అనంతరం నితిన్ హీరోగా గతేడాది భీష్మా సినిమా రూపొందించి మరో హిట్ ఖాతాలో వేసుకున్నాడు. మొత్తానికి తనకంటూ ప్రత్యేక గుర్తింపు దిశగా సినిమాలు ప్లాన్ చేసుకుంటున్నాడు వెంకీ. అయితే భీష్మా వచ్చి ఏడాది గడిచినా వెంకీ తదుపరి సినిమా ఏంటి ఎవరితో అనేది ఇంకా ప్రకటించలేదు.

కానీ తాజా సమాచారం ప్రకారం.. వెంకీ మెగాహీరో వరుణ్ తేజ్ కు ఓ కథ వినిపించడం జరిగిందట. అలాగే వరుణ్ తేజ్ కూడా స్క్రిప్ట్ చదివి సానుకూలంగా స్పందించినట్లు టాక్ నడుస్తుంది. మరి ఇండస్ట్రీలో నడుస్తున్న కథనాలను బట్టి డైరెక్టర్ వెంకీ కుడుముల - వరుణ్ తేజ్ కాంబినేషన్ మూవీ దసరా సమయంలో సెట్స్ పైకి వెళ్లనున్నట్లు తెలుస్తుంది. మరి ఈ విషయం పై ఇంకా క్లారిటీ రావాల్సి ఉంది. ప్రస్తుతం మెగాహీరో గని - ఎఫ్3 సినిమాలతో బిజీగా ఉన్నాడు. అవి ముగిస్తేగాని ప్రస్తుతం తదుపరి సినిమా ప్రకటించే సూచనలు కనిపించడం లేదట. చూడాలి మరి వెంకీ - వరుణ్ కాంబో తెరపైకి రానుందేమో!