బిగ్ బాస్ ఫేం మెహబూబ్ `గుంటూరు మిర్చి` వెబ్ సిరీస్

`బిగ్ బాస్ - తెలుగు`లో ఇంటి స‌భ్యులుగా క‌నిపించిన ప‌లువురు టాలీవుడ్ స్టార్లుగా రాణిస్తున్న సంగ‌తి తెలిసిందే. ఇప్పుడు యూట్యూబ్ స్టార్ .. `బిగ్ బాస్ తెలుగు- 4` ఫేమ్ మెహబూబ్ దిల్ సే `గుంటూరు మిర్చి` అనే తెలుగు వెబ్ సిరీస్ తో అభిమానుల ముందుకు వ‌స్తున్నారు. ఇది టాలీవుడ్ లో అత్యంత భారీ బ‌డ్జెట్ తో రూపొందుతున్న సిరీస్.

హై-ఆక్టేన్ యాక్షన్ సీక్వెన్స్ ల‌తో అత్యంత భారీగా రూపొందిన‌ ఈ సిరీస్ సంఘంలో న్యాయం కోసం పోరాడే బాధ్యతాయుతమైన కుర్రాడి ప్రయాణాన్ని తెర‌పై ఆవిష్క‌రిస్తుంది. పేద‌లు.. రైతుల కష్టాలు వంటి సమకాలీన సమస్యలను కూడా ఈ సిరీస్ లో ఆవిష్క‌రిస్తున్నారు.

గుంటూరు మిర్చిలో మెహబూబ్ పాత్ర ఆద్యంతం ఎమోష‌న‌ల్ యాక్ష‌న్ ఎపిసోడ్స్ తో ర‌క్తి క‌ట్టిస్తుంది. సంద‌ర్భానుసారం అత‌డిలోంచి హీరోయిజం బ‌య‌ట‌ప‌డే విధంగా పాత్ర‌ను తీర్చిదిద్దారు. గుంటూరు మిర్చి ఇప్పుడు యూట్యూబ్ లో ప్రసారం అవుతోంది. గూగుల్ ట్రెండింగ్ జాబితాలో #నం.1 స్థానంలో ఉంది. చిన్న తెర‌లపై ఈ యాక్షన్ ప్యాక్డ్ సిరీస్ ని వీక్షించేందుకు అందుబాటులో ఉంది. వెబ్ సిరీస్ లతో ఫేమ‌స్ అయ్యి వెండితెర క‌థానాయ‌కుడిగానూ ఓ వెలుగు వెలుగుతాడ‌నే ఫ్యాన్స్ ఆశిస్తున్నారు.