నా లైఫ్ లో మళ్లీ మంచి రోజులు వచ్చాయి

తెలుగు తెరకి పరిచయమైన అందమైన కథానాయికలలో మెహ్రీన్ ఒకరు. ముద్దమందారంపై ముద్ద కర్పూరం పెట్టినట్టుగా కనిపించే ఈ అమ్మాయి, 'కృష్ణగాడి వీరప్రేమగాథ' సినిమాతో తొలి ప్రయత్నంలోనే విజయాన్ని సాధించింది. పడుచు మనసులను పొలోమంటూ పడగొట్టేసింది. ఆ తరువాత చేసిన 'మహానుభావుడు' .. 'రాజా ది గ్రేట్' సినిమాలు ఆమె కెరియర్ కి మంచి హెల్ప్ అయ్యాయి. ఈ రెండు సినిమాలు ఆమెను స్టార్ హీరోయిన్స్ రేసులో నిలబెట్టాయి.

పెళ్లి ఆలోచనతో చాలా అవకాశాలను వదులుకున్న మెహ్రీన్, పెళ్లి రద్దు కావడంతో మళ్లీ కెరియర్ పై దృష్టి పెట్టింది. ఆ ప్రయత్నంలో భాగంగానే ఆమె మారుతి దర్శకత్వంలో 'మంచి రోజులు వచ్చాయి' సినిమా చేసింది. కొత్త కుర్రాడైన సంతోష్ శోభన్ జోడీగా చేయడానికి ఆమె సిద్దపడటమనేది, తిరిగి తాను బిజీ కావడానికి ఆమె పడుతున్న తపనగానే అర్థం చేసుకోవాలి. ఈ సినిమాలో ఆమె అజయ్ ఘోష్ కూతురుగా నటించింది. ఎస్.కె.ఎన్. నిర్మించిన ఈ సినిమా, దీపావళి పండుగ సందర్భంగా నవంబర్ 4వ తేదీన విడుదల కానుంది. గోపీచంద్ ముఖ్యఅతిథిగా ఈ సినిమా ప్రీ రిలీజ్ ఈవెంట్ నిన్నరాత్రి హైదరాబాదులో జరిగింది.

ఈ వేదికపై మెహ్రీన్ మాట్లాడుతూ .. " ఇక్కడికి వచ్చిన అందరికీ నమస్కారం .. నా లైఫ్ లో మళ్లీ మంచి రోజులు వచ్చాయి. నాకు ఈ అవకాశాన్ని ఇచ్చిన మారుతీ సార్ కీ .. యూవీ క్రియేషన్స్ వారికి చాలా థ్యాంక్స్ చెబుతున్నాను. అల్లు అరవింద్ గారు రావడం చాలా సర్ప్రైజ్ గా ఉంది .. ఆయన నా ఈవెంట్స్ కి వచ్చిన ప్రతిసారి నాకు చాలా బాగుంటుంది. గోపీచంద్ గారితో ఇంతకుముందు నేను రెండు సినిమాలకి కలిసి వర్క్ చేశాను. ఆయనను ఇక్కడ చూస్తున్నందుకు చాలా సంతోషంగా ఉంది.

ఆయన సినిమా 'పక్కా కమర్షియల్' కోసం నేను కూడా వెయిట్ చేస్తున్నాను .. చాలా బాగుంటుందని అనుకుంటున్నాను, సంతోష్ చాలామంచి కో స్టార్ .. అంతకుమించి మంచి ఫ్రెండ్. ఆయన అమేజింగ్ యాక్టర్ .. అందుకు తగినవిధంగా కష్టపడతాడు. ఈ సినిమా ఇంతబాగా రావడానికి కారకులైన టీమ్ అందరికీ థ్యాంక్స్ చెబుతున్నాను. అందరం కూడా ఒక ఫ్యామిలీ మెంబర్స్ గా కలిసి పోయి పనిచేశాము. దీపావళికి ఈ సినిమా వస్తోంది .. అందరూ థియేటర్స్ లో చూసి ఎంజాయ్ చేయండి" అని చెప్పుకొచ్చింది.