మెహ్రీన్ మెరుపులు అంతేనా?

‘కృష్ణగాడి వీర ప్రేమగాథ’ లాంటి హిట్ సినిమాతో కథానాయికగా పరిచయమైంది మెహ్రీన్ కౌర్. ఇలా తొలి సినిమాతోనే సక్సెస్ చూసిన హీరోయిన్లు వెంట వెంటనే సినిమాలు చేసేస్తుంటారు. మెహ్రీన్ కు కూడా నాలుగు సినిమాల్లో అవకాశాలైతే వచ్చాయి కానీ.. వాటిలో ఒకదాని తర్వాత ఒకటి కాకుండా అన్నీ కలిపి రెండు మూడు నెలల వ్యవధిలో రిలీజయ్యాయి. మెహ్రీన్ రెండో సినిమా ‘మహానుభావుడు’ సూపర్ హిట్టయి ఆమెకు మంచి పేరు తెచ్చింది. ఆ తర్వాత ‘రాజా ది గ్రేట్’ కూడా మంచి ఫలితాన్నే అందించి ఆమెను హ్యాట్రిక్ హీరోయిన్ అనిపించింది. ఈ ఊపులో మెహ్రీన్ చాలా పెద్ద రేంజికి వెళ్లిపోతుందని.. ఆమెకు స్టార్ హీరోల సరసన అవకాశాలు వచ్చేస్తాయని అనుకున్నారు.

కానీ కట్ చేస్తే.. మెహ్రీన్ కెరీర్ ఇప్పుడు ఆశించిన స్థాయిలో లేదు. ‘రాజా ది గ్రేట్’ తర్వాత మెహ్రీన్ నుంచి వచ్చిన ‘కేరాఫ్ సూర్య’.. ‘జవాన్’ తుస్సుమనిపించాయి. మెహ్రీన్ కెరీర్ తిరోగమనంలో పయనించింది. ఇప్పుడు మెహ్రీన్ చేతిలో ఒక్క సినిమా కూడా ఉన్నట్లుగా లేదు. ఆమె గురించి అసలు డిస్కషనే లేదు. మూణ్నాలుగు నెలల పాటు ఆమె గురించి జోరుగా చర్చలు సాగాయి. ఇప్పుడేమో సైలెంటైపోయారు. ‘కృష్ణగాడి వీర ప్రేమ గాథ’ రిలీజైనపుడు కూడా ఆమె గురించి ఇలాగే డిస్కషన్ నడిచింది. ఆ తర్వాత అందరూ మరిచిపోయారు. ఐతే అప్పుడు ఆమె చేతిలో చాలా సినిమాలున్నాయి. కానీ ఇప్పుడైతే మెహ్రీన్ ఖాళీగానే ఉన్నట్లు కనిపిస్తోంది. మరి ఆమెకు ఛాన్సులిచ్చేదేవెరో?