దేవసేన అవుతానంటున్న మెహ్రీన్

ఒక అరుంధతి.. ఒక రుద్రమదేవి.. ఒక బాహుబలి.. ఒక భాగమతి.. అనుష్క కెరీర్లో మైలురాళ్లుగా నిలిచిపోయిన సినిమాలివి. అందరు హీరోయిన్లకూ దక్కే అవకాశాలు కావివి. ఈ సినిమాలతో హీరోయిన్లలో ఒక లెజెండరీ స్టేటస్ తెచ్చేసుకుంది అనుష్క. అందుకే ఆమె చాలా మంది హీరోయిన్లకు రోల్ మోడల్ అయిపోయింది. టాలీవుడ్ లేటెస్ట్ సెన్సేషన్ మెహ్రీన్ కౌర్ సైతం తనకు అనుష్కే స్ఫూర్తి అంటోంది. ఆమె పాత్రలు తనకెంతో ఇష్టమని చెబుతోంది.

అనుష్క పాత్రల్లో మీకేది ఇష్టమని అడిగితే.. ‘బాహుబలి’లో దేవసేన పాత్ర చేయాలని ఉందని.. ఎప్పుడైనా అలాంటి పాత్ బ్రేకింగ్ క్యారెక్టర్ చేసే అవకాశం వస్తే తన అంత సంతోషించే వాళ్లు మరొకరు ఉండరని అంటోంది మెహ్రీన్. దేవసేనలా గుర్రపు స్వారీ చేయడానికి కూడా తాను సిద్ధమని.. తనకు కొంచెం కొంచెం గుర్రపు స్వారీ వచ్చని.. దేవసేన లాంటి పాత్ర వస్తే ఎంత కష్టపడైనా పర్ఫెక్షన్ సాధిస్తానని ఆమె చెప్పింది.

తమ కుటుంబానికి గుర్రాలు పెంచే అలవాటు ఉందని.. అలా తనకు గుర్రాలతో మంచి సాన్నిహిత్యమే ఉందని మెహ్రీన్ చెప్పింది. చిన్నప్పట్నుంచి షూటర్ గా గొప్ప పేరు సంపాదించాలని కలలు కన్నానని.. జాతీయ స్థాయి పోటీల్లోనూ పాల్గొన్నానని.. ఐతే అనుకోకుండా వేరే ‘షూటింగ్’ వైపు కెరీర్ టర్న్ తీసుకుందని మెహ్రీన్ తెలిపింది. దర్శకుల్లో తనకు రాజమౌళితో పని చేయాలన్నది కూడా డ్రీమ్ అని ఆమె చెప్పింది.