తెలుగు ఫిల్మ్‌ ఇండస్ట్రీ లో సర్కారు వారి 'పాట' రికార్డ్‌

మహేష్ బాబు హీరోగా పరశురామ్ దర్శకత్వంలో రూపొందుతున్న సర్కారు వారి పాట నుండి ఇప్పటికే రెండు పాటలు విడుదల అయ్యాయి. రెండు పాటలకు కూడా మంచి స్పందన వచ్చింది. ఈ సినిమా నుండి మొదట విడుదల అయిన కళావతి పాట కు వంద మిలియన్ ల వ్యూస్ దక్కాయి. 40 రోజుల లోపులోనే కళావతి వంద మిలియన్ ల వ్యూస్ ను దక్కించుకోవడం రికార్డ్‌ గా చెప్పుకోవచ్చు.

ఇప్పటి వరకు ఏ తెలుగు సినిమా పాట కూడా ఇంత స్పీడ్‌ గా వంద మిలియన్ ల వ్యూస్ ను దక్కించుకున్న దాఖలాలు లేవు. గత నెలలో వాలెంటైన్స్ డే సందర్బంగా విడుదల అయిన సర్కారు వారి పాట మొదటి సింగిల్ కు అనూహ్యంగా దక్కిన ఆధరణ సినిమా పై అంచనాలు మరింతగా పెంచాయి. పాట లో విజువల్స్ ను అద్బుతంగా యూట్యూబ్‌ లో చూపించడం తో పాటు ఆకట్టుకునే విధంగా థమన్ ఈ పాటను ట్యూన్‌ చేశాడు.

ఈ పాటను సిద్‌ శ్రీరామ్‌ పాడటం ఒక హైలైట్‌ అయితే మరో హైలైట్‌ గా మహేష్ బాబు స్టెప్స్‌ నిలిచాయి. పాట విడుదల అయినప్పటి నుండి సోషల్‌ మీడియాలో ఈ పాట కు చెందిన హుక్ స్టెప్స్ ను తెగ చేస్తున్నారు. కళావతి స్టెప్స్‌ ఛాలెంజ్ అంటూ మహేష్ బాబు కూతురు సితార డాన్స్ వీడియో ను షేర్‌ చేసింది. దాంతో చాలా మంది కళావతి పాట హుక్‌ స్టెప్‌ తో సోషల్‌ మీడియాలో సందడి చేశారు.

సోషల్‌ మీడియాలో కళావతి ట్రెండ్‌ అవ్వడం వల్ల కూడా యూట్యూబ్‌ లో చాలా స్పీడ్‌ గా వంద మిలియన్ ల వ్యూస్ దక్కాయి అంటూ కొందరు అభిప్రాయం వ్యక్తం చేస్తున్నారు. మొత్తానికి సర్కారు వారి పాట విడుదలకు ఇంకా చాలా రోజులు ఉండగానే రికార్డుల వేట మొదలు పెట్టడం పట్ల మహేష్ బాబు అభిమానులు ఆనందం వ్యక్తం చేస్తూ కళావతి వంద మిలియన్‌ ల వ్యూస్ ను సెలబ్రేట్‌ చేసుకుంటున్నారు.

వంద మిలియన్ ల వ్యూస్ తో పాటు అత్యధికంగా లైక్స్ ను కూడా ఈ పాట యూట్యూబ్‌ లో రాబట్టింది. ఇప్పటి వరకు 1.7 మిలియన్ ల లైక్స్ ను సొంతం చేసుకున్న ఈ పాట త్వరలోనే రెండు మిలియన్ ల వ్యూస్ ను దక్కించుకుంటుంది అనే నమ్మకం ను ప్రతి ఒక్కరు వ్యక్తం చేస్తున్నారు. మే 12వ తారీకున ప్రపంచ వ్యాప్తంగా భారీ ఎత్తున ఈ సినిమా ను విడుదల చేయబోతున్నారు. సమ్మర్ లో ఈ సినిమా మహేష్ బాబు అభిమానులకు మంచి వినోదాన్ని పంచుతుందనే నమ్మకం వ్యక్తం అవుతోంది.