'లంబసింగి' కోసం సిద్ శ్రీరామ్ పాడిన మెలోడీ బాగా నచ్చేసిందే..!

'సోగ్గాడే చిన్న నాయ‌నా' 'బంగార్రాజు' చిత్రాల‌తో త‌న‌కంటూ మంచి గుర్తింపు తెచ్చుకున్న దర్శకుడు క‌ల్యాణ్ కృష్ణ కుర‌సాల.. ఇప్పుడు ''లంబసింగి'' సినిమాతో నిర్మాతగా అదృష్టాన్ని ప‌రీక్షించుకునేందుకు రెడీ అయ్యారు. 'ఏ ప్యూర్ ల‌వ్ స్టోరీ' అనే ట్యాగ్ లైన్‌ తో ఇటీవలే ఈ చిత్రాన్ని అధికారికంగా ప్రకటించారు.

''లంబసింగి'' మూవీతో భరత్ రాజ్ హీరోగా పరిచయమవుతుండగా.. ‘బిగ్‌ బాస్‌’ ఫేమ్‌ దివి వైధ్య కథానాయికగా నటించింది. 'గాలి ప‌టం' ఫేమ్ న‌వీన్ గాంధీ ఈ చిత్రానికి ద‌ర్శ‌క‌త్వం వ‌హిస్తున్నారు. క‌ల్యాణ్ కృష్ణ సమర్పిస్తున్న ఈ సినిమాని కాన్సెప్ట్ ఫిలిమ్స్ బ్యానర్ పై జీకే మోహన్‌ నిర్మింస్తున్నారు.

ఇటీవలే రిలీజ్ చేసిన ‘లంబసింగి’ సినిమాకు సంబంధించిన ఫస్ట్ లుక్ పోస్టర్ కు మంచి రెస్పాన్స్ వచ్చింది. ప్రస్తుతం పోస్ట్‌ ప్రొడక్షన్‌ పనులు జరుపుకుంటున్న ఈ మూవీ మ్యూజికల్ ప్రమోషన్స్ మొదలు పెట్టారు. కింగ్ అక్కినేని నాగార్జున తాజాగా సినిమాలోని 'నచ్చేసిందే నచ్చేసిందే' అనే ఫస్ట్ సింగిల్ ను రిలీజ్ చేసి చిత్ర బృందానికి శుభాకాంక్షలు తెలియజేశారు.

'నచ్చేసిందే.. నచ్చేసిందే.. నాకెంతో నచ్చిందే ఈ పిల్లా.. నవ్వేసిందే.. నవ్వేసిందే.. నా మనసే తవ్వేసిందే ఇలా..' అంటూ సాగిన ఈ పాట శ్రోతలను విశేషంగా ఆకట్టుకుంటోంది. RR ధ్రువ‌న్ ఈ మెలోడీకి ఫ్రెష్ ట్యూన్ కంపోజ్ చేయగా.. సిద్ శ్రీరామ్ తనదైన గాత్రంతో మరోసారి మెస్మరైజ్ చేసాడు. దీనికి కాసర్ల శ్యామ్ సాహిత్యం అందించారు

హీరోయిన్ ప్రేమ కోసం తపించే హీరో.. ఆమెను ఫాలో అవుతూ తనలోని భావాలను ఈ పాట రూపంలో తెలియజేస్తున్నాడు. విజువల్ గానూ 'నచ్చేసిందే నచ్చేసిందే' పాట చాలా బ్యూటీఫుల్ గా ఉంది. కె బుజ్జి ఈ చిత్రానికి సినిమాటోగ్రఫీ నిర్వహించగా.. కె విజయ్ వర్ధన్ ఎడిటింగ్ వర్క్ చేశారు.