మెర్శల్ టీం రచ్చ రంబోలా చేసిందే..

దీపావళికి సౌత్ ఇండియా అంతటా చర్చనీయాంశం అయిన సినిమా ‘మెర్శల్’. అనేక వివాదాలు ఈ సినిమాను చుట్టముట్టడంతో దీని గురించి పెద్ద చర్చే నడిచింది. ఆ వివాదాలు సినిమాకు మంచి పబ్లిసిటీ కూడా తెచ్చిపెట్టాయి. అవి వసూళ్లకు తోడ్పడ్డాయి. పది రోజుల్లోనే రూ.200 కోట్ల గ్రాస్ వసూళ్లతో ఈ చిత్రం సంచలనం సృష్టించింది. మొత్తానికి సినిమా బ్లాక్ బస్టర్ రేంజికి చేరడంతో చిత్ర బృందం సంబరాలు మొదలుపెట్టింది.

హీరో విజయ్ స్వయంగా ‘మెర్శల్’ టీం మొత్తానికి పార్టీ ఇచ్చాడు. మామూలుగా చాలా సింపుల్ గా ఉండే విజయ్ ఈ వేడుకలో బాగానే సందడి చేశాడు. విజయ్ లాగే సింపుల్ గా ఉండే సంగీత దర్శకుడు ఎ.ఆర్.రెహమాన్ కూడా ఈ వేడుకలో ఉత్సాహంగా కనిపించాడు. దర్శకుడు అట్లీ.. ఈ చిత్రంలో విలన్ పాత్రలో మెప్పించిన ఎస్.జె.సూర్య తదితరులు కూడా సక్సెస్ పార్టీలో బాగానే ఎంజాయ్ చేశారు. దీనికి సంబంధించిన ఫొటోలు సోషల్ మీడియాలో హల్ చల్ చేస్తున్నాయి.

మరోవైపు ‘మెర్శల్’ తెలుగు వెర్షన్ ‘అదిరింది’ విడుదలకు మార్గం సుగమమైంది. రెండు రోజుల కిందటే ఈ చిత్రానికి సెన్సార్ పూర్తయింది. ఈ నెల 9న.. గురువారం ఈ చిత్రం తెలుగు రాష్ట్రాల్లో విడుదల కాబోతోంది. పవన్ కళ్యాణ్ మిత్రుడు శరత్ మరార్ ఈ చిత్రాన్ని తెలుగులో అందిస్తున్న సంగతి తెలిసిందే. విజయేంద్ర ప్రసాద్ స్క్రీన్ ప్లే సమకూర్చిన ఈ చిత్రంలో విజయ్ సరసన సమంత.. కాజల్.. నిత్యా మీనన్ నటించారు.