'లైగర్' చిత్రంలో మైక్ టైసన్..?

డాషింగ్ డైరెక్టర్ పూరీ జగన్నాథ్ - సెన్సేషనల్ స్టార్ విజయ్ దేవరకొండ కాంబినేషన్ లో తెరకెక్కుతున్న లేటెస్ట్ మూవీ ''లైగర్''. 'సాలా క్రాస్ బ్రీడ్' అనేది దీనికి ట్యాగ్ లైన్. మార్షల్‌ ఆర్ట్స్‌ కథాంశంతో హై వోల్టేజ్ యాక్షన్ ఎంటర్టైనర్ గా ఈ చిత్రాన్ని తీర్చిదిద్దుతున్నారు. దీని కోసం జాకీచాన్ చిత్రాలకు వర్క్ చేసిన ప్రముఖ హాలీవుడ్ స్టంట్ కొరియోగ్రాఫర్ ఆండీ లాంగ్ సారధ్యంలో స్పెషల్ యాక్షన్ ఎపిసోడ్స్ డిజైన్ చేస్తున్నారు. హీరో విజయ్ కూడా ఈ సినిమా కోసం మిక్స్డ్ మార్షల్ ఆర్ట్స్ లో శిక్షణ తీసుకున్నారు. అయితే ఇప్పుడు ఈ చిత్రంలో ప్రపంచ ప్రఖ్యాత బాక్సర్ మైక్ టైసన్ కనిపించబోతున్నారని వార్తలు వస్తున్నాయి.

ప్రపంచ బాక్సింగ్ చరిత్రలోనే మైక్ టైసన్ ఓ సంచలనం. అప్పటివరకు ఏ బాక్సర్ సాధించని ఎన్నో రికార్డును సృష్టించాడు. అయితే 1997లో ఆవేశంతో తోటి బాక్సర్ హోలీఫీల్డ్ చెవి కొరికి బాక్సింగ్ నుంచి సస్పెండ్ చేయబడ్డాడు. బాక్సింగ్ చరిత్రలో సెన్సేషనల్ గా మిగిలిపోయిన టైసన్ ను.. యంగ్ సెన్సేషన్ విజయ్ నటించే 'లైగర్' చిత్రంలో నటింపజేయాలని చూస్తున్నారని ఆ మధ్య వార్తలు వచ్చాయి. ఏడాదిన్నర క్రితమే కరణ్ జోహార్ బృందం టైసన్ ను సంప్రదించగా.. ఇప్పుడు ఓకే చెప్పినట్లు టాక్ వినిపిస్తోంది.

ఇకపోతే 'లైగర్' సినిమాకు సంబంధించిన మేజర్ షెడ్యూల్ షూటింగ్ అమెరికా లో ప్లాన్ చేసుకున్నారు. విదేశీ బాక్సర్స్ తో పాటుగా విజయ్ పాల్గొనే క్లైమాక్స్ సీన్స్ ని కూడా అక్కడే షూట్ చేయాలని అనుకున్నారు. కానీ ఇప్పుడు అమెరికా షెడ్యూల్ పై క్లారిటీ లేకుండా పోయింది. హైదరాబాద్ లేదా ముంబై లలో సెట్స్ వేసి షూట్ చేస్తారని అనుకుంటున్నారు. ఈ నేపథ్యంలో మైక్ టైసన్ ను ఇండియా రావడానికి ఒప్పిస్తారా లేక ఎలాగోలా ఫారిన్ షెడ్యూల్ ప్లాన్ చేసుకుంటారా అనేది చూడాలి. ఏదేమైనా పూరీ జగన్నాథ్ - విజయ్ దేవరకొండ కలిసి చేస్తున్న ఫస్ట్ పాన్ ఇండియా మూవీ 'లైగర్' లో మైక్ టైసన్ నటిస్తే మాత్రం భారీ హైప్ క్రియేట్ అయ్యే అవకాశం ఉంది.