'మిరపకాయ్' బ్యాచ్ మళ్ళీ కలుస్తున్నారా..?

మాస్ మహారాజా రవితేజ హీరోగా తెరకెక్కిన 'షాక్' సినిమాతో ద‌ర్శ‌కుడిగా పరిచయమయ్యారు హ‌రీష్ శంక‌ర్‌. ఈ సినిమా ప్లాప్ అయినప్పటికీ ఆ తర్వాత ఐదేళ్ళకి అదే హీరోతో 'మిరపకాయ్' తీసి సూపర్ హిట్ కొట్టారు. అయితే ఈ సినిమా వీరిద్దరి కాంబోలో మ‌రో సినిమా చేయాల‌ని అనుకుంటున్నా ఎందుకో కుదరలేదు. అప్పట్లో 'మిరపకాయ్' చిత్రానికి సీక్వెల్ చేస్తారని వార్తలు వచ్చాయి కానీ అవి పుకార్లుగానే మిగిలిపోయాయి. ఈ నేపథ్యంలో రవితేజ - హరీష్ శంకర్ కాంబినేషన్ లో హ్యాట్రిక్ మూవీకి ప్రయత్నాలు జరుగుతున్నాయని ఇప్పుడు సినీ వర్గాల్లో టాక్ వినిపిస్తోంది.

రవితేజ ని దృష్టిలో పెట్టుకొని స్టోరీ రెడీ చేసిన హరీష్ శంకర్.. ఇటీవలే హీరోని కలిసి కథ వినిపించాడట. దీనికి రవితేజ సైడ్ నుంచి గ్రీన్ సిగ్నల్ వచ్చిందని.. ఇది మాస్ రాజా శైలికి తగ్గుట్టు ఎంటర్టైన్మెంట్ తో పాటు కమర్షియల్ హంగులు జత చేసి ఉంటుందని చెప్పుకుంటున్నారు. ప్రస్తుతం పవర్ స్టార్ పవన్ కళ్యాణ్ తో రెండో సినిమా చేస్తున్నాడు హరీష్. మైత్రీ మూవీ మేకర్స్ బ్యానర్ పై తెరకెక్కనున్న ఈ సినిమా త్వరలోనే సెట్స్ పైకి వెళ్లనుంది. 'గ‌బ్బ‌ర్ సింగ్‌' తర్వాత భారీ అంచనాలతో రాబోతున్న ఈ చిత్రం వచ్చే ఏడాది ప్రేక్షకుల ముందుకు రానుంది. ప‌వ‌న్ ప్రాజెక్టు కంప్లీట్ అయిన తరువాత ర‌వితేజ సినిమా స్టార్ట్ అయ్యే అవ‌కాశం ఉంది.

ఇకపోతే 'క్రాక్' సినిమాతో బ్లాక్ బస్టర్ హిట్ అందుకున్న రవితేజ.. ప్రస్తుతం 'రాక్షసుడు' ఫేమ్ రమేష్ వర్మతో 'ఖిలాడి' సినిమా చేస్తున్నాడు. ఈ క్రమంలో ఉగాది సందర్భంగా కొత్త దర్శకుడు శరత్‌ మండవ దర్శకత్వంలో ఓ సినిమాని లాంఛనంగా ప్రారంభించాడు. వాస్తవ సంఘటనల ఆధారంగా రూపొందే ఈ యాక్షన్‌ థ్రిల్లర్‌ ని ఎస్.ఎల్.వి సినిమాస్ పతాకంపై సుధాకర్ చెరుకూరి నిర్మిస్తున్నారు.