'మోడ్రన్ లవ్ హైదరాబాద్' ట్రైలర్: ప్రేమలోని విభిన్న కోణాలను వర్ణించే 6 కథల సమాహారం..!

ఓటీటీలు అందుబాటులోకి వచ్చిన తర్వాత మేకర్స్ కు ఎప్పటికప్పుడు ఆసక్తికరమైన కంటెంట్ ను ప్రేక్షకులకు అందించే అవకాశం లభించిందని చెప్పాలి. నటీనటులకు విభిన్నమైన పాత్రల్లో నటించాడని ఆస్కారం దొరుకుతుంది. ఇటీవల కాలంలో అనేక వెబ్ సిరీసులు సినిమాలతో సమానంగా విశేష ఆదరణ పొందాయి. ఈ నేపథ్యంలో ఇప్పుడు తెలుగులో ''మోడ్రన్ లవ్ హైదరాబాద్'' అనే మరో సరికొత్త సిరీస్ స్ట్రీమింగ్ కు రెడీ అయింది.

న్యూయార్క్ టైమ్స్ లో ప్రచురితమైన కథనాల స్ఫూర్తితో ప్రముఖ ఓటీటీ అమెజాన్ ప్రైమ్ వీడియో ''మోడ్రన్ లవ్ హైదరాబాద్'' సిరీస్ ను రూపొందించిందని తెలుస్తోంది. ఇందులో పలువురు ప్రముఖ నటీనటులు సాంకేతిక నిపుణులు భాగమయ్యారు. సుహాసిని మణిరత్నం - రేవతి - ఆది పినిశెట్టి - నిత్యా మీనన్ - రీతూ వర్మ - మాళవిక నాయర్ - అభిజిత్ దుద్దాల - రేవతి - నరేష్ - నరేష్ అగస్త్య - కోమలీ ప్రసాద్ - ఉల్కా గుప్తా తదితరులు ప్రధాన పాత్రల్లో ఈ సిరీస్ తెరకెక్కింది.

'మోడ్రన్ లవ్ హైదరాబాద్' ను జూలై 8వ తేదీ నుంచి అమెజాన్ లో స్ట్రీమింగ్ చేయబోతున్నారు. ఈ నేపథ్యంలో ఇటీవల విడుదలైన టీజర్ మంచి స్పందన తెచ్చుకుంది. తాజాగా మేకర్స్ ట్రైలర్ ను లాంచ్ చేశారు. 'భాష కనిపెట్టకముందే మాట్లాడటడం రాకముందే మనుషులు ప్రేమించుకున్నారు' అంటూ ప్రారంభమైన ఈ ట్రైలర్ ఆసక్తికరంగా సాగింది.

హైదరాబాద్ సిటీ బ్యాక్ డ్రాప్ లో 6 వైవిధ్యమైన కథల సమాహారంగా.. ఆధునిక సంబంధాల గురించి మరియు ప్రేమలోని పలు పార్శ్వాలను ఈ సిరీస్ లో చూపించనున్నారని ట్రైలర్ చూస్తే అర్థం అవుతోంది. ఆరు ఎపిసోడ్స్ గా రానున్న ఈ ఆంథాలజీలోని 6 కథల్లో ప్రతి ఒక్కటి ఒక నిర్దిష్ట రకమైన సంబంధాన్ని మరియు ప్రేమలోని విభిన్న కోణాన్ని వర్ణించనుందని తెలుస్తోంది.

''మోడ్రన్ లవ్ హైదరాబాద్'' ఆంథాలజీ సిరీస్ కు నగేశ్ కుకునూర్ ('గుడ్ లక్ సఖి' ఫేమ్) - వెంకటేశ్ మహా (కేరాఫ్ కంచరపాలెం సినిమా ఫేం) - ఉదయ్ గుర్రాల - దేవికా దర్శకత్వం వహించారు. ఇదే కథాంశంతో హిందీలో రూపొందిన 'మోడర్న్ లవ్ ముంబయి' సిరీస్ ఇటీవల విడుదలై మంచి ఆదరణ దక్కించుకుంది.

అలానే తమిళ నేటివిటీకి తగ్గట్టుగా రూపొందించిన 'మోడర్న్ లవ్ చెన్నై' సిరీస్ త్వరలోనే ప్రైమ్ వీడియోలో స్ట్రీమింగ్ కాబోతోంది. అంతకంటే ముందుగా ఓటీటీలోకి రాబోతున్న తెలుగు షో 'మోడ్రన్ లవ్ హైదరాబాద్' ఎలాంటి ఆదరణ తెచ్చుకుంటుందో చూడాలి.