గురువుపై కలెక్షన్ కింగ్ ఎమోషన్

సరిగ్గా ఇదే రోజు ఏడాది క్రితం పరమపదించిన దర్శకరత్న దాసరి నారాయణరావుగారిని సినిమా వర్గాలే కాదు ప్రేక్షకులు సైతం మర్చిపోవడం అసాధ్యం. అప్పుడే ఏడాది గడిచిందాని అనిపించడం కూడా సహజం. ఆయనతో అత్యంత సన్నిహితంగా మెలిగే వాళ్ళల్లో కలెక్షన్ కింగ్ మోహన్ బాబు అగ్రజులు. ఆయన సినిమాతోనే తెరంగేట్రం చేసి ఆయన దర్శకత్వం వహించిన ఎన్నో సినిమాల్లో మరుపురాని పాత్రల్లో నటించి గొప్ప పేరు తెచ్చుకున్న మోహన్ బాబు కు దాసరి గారంటే విపరీతమైన గౌరవం. ఆయన ప్రధమ వర్ధంతిని పురస్కరించుకుని తన ట్విట్టర్ లో ఎమోషనల్ మెసేజ్ ఒకటి పోస్ట్ చేసారు మోహన్ బాబు. అనుక్షణం మా కళ్ళలో మీరు సజీవంగా ఉన్నారని తన కుటుంబానికి ఆశీసులు అందిస్తూనే ఉన్నారని ఈ సందర్బంగా ఆయన నివాళి అర్పించారు. మెసేజ్ తో పాటు దాసరిగారితో నటించిన ఒక ఫోటో కూడా పోస్ట్ చేసిన మోహన్ బాబు కాసేపు అలా ఫ్లాష్ బ్యాక్ లో తీసుకెళ్లారు.

దాసరి గారితో ఉన్న పిక్ వివరాలు మోహన్ బాబు చెప్పలేదు కానీ అది పుణ్యభూమి నా దేశం సినిమాలోనిది. హిందీలో సూపర్ హిట్ గా నిలిచిన క్రాంతి వీర్ రీమేక్ గా కోదండరామిరెడ్డి దర్శకత్వంలో మోహన్ బాబు దీన్ని స్వయంగా నిర్మించారు. చిన్నప్పటి మోహన్ బాబుగా ఇందులో మంచు మనోజ్ కూడా నటించాడు. అంచనాలు మరీ ఎక్కువ కావడంతో వాటిని అందుకోలేక సినిమా ఆశించిన ఫలితం ఇవ్వలేదు. కానీ దాసరి-మోహన్ బాబు కాంబోలో వచ్చే సీన్లు మాత్రం ప్రేక్షకులను బాగా ఆకట్టుకున్నాయి. ఇన్నాళ్లకు ఆ జ్ఞాపకాన్ని సందర్భాన్ని షేర్ చేసుకున్న మోహన్ బాబు మరోసారి తన గురుభక్తిని చాటుకున్నారు