మెహ‌న్‌ బాబు హోట‌ల్ బిజినెస్‌

సినిమావాళ్ల వ్యాపారాల గురించి తెలిసిందే. వాళ్లు సినిమాతో పాటు వేరే రంగాల్లోనూ పెట్టుబ‌డులు పెడుతూ డ‌బ్బులు సంపాదిస్తుంటారు. మంచు మోహ‌న్‌బాబు కూడా సినిమాతోపాటు, ఎడ్యుకేష‌న్ రంగంలోనూ కొన‌సాగుతున్న విష‌యం తెలిసిందే. శ్రీ విద్యానికేత‌న్‌ ని ప్రారంభించి యూనివ‌ర్సిటీ లెవెల్లో న‌డుపుతున్నాడాయ‌న‌. అయితే ఇప్పుడు ఆయ‌న హోట‌ల్ బిజినెస్ కూడా మొద‌లుపెట్టాడు. శ్రీ విద్యానికేత‌న్‌ కి ఎదురుగానే రోడ్డుపై ఇడ్లీలు - దోశెలు అమ్ముతూ వ్యాపారం చేస్తున్నాడు. మోహ‌న్‌ బాబులాంటి పెద్ద న‌టుడు - ధ‌న‌వంతుడు ఇలా రోడ్డు ప‌క్క‌న హోట‌ల్ పెట్ట‌డ‌మేంటి అంటారా? అదంతా కూతురు ల‌క్ష్మీ ప్ర‌స‌న్న చొర‌వ‌తోనే. చెన్నై వ‌ర‌ద బాధితుల స‌హాయార్థం ల‌క్ష్మీ ప్ర‌స‌న్న మేము సైతం అనే ఓ టీవీ ప్రోగ్రామ్‌ ని నిర్వ‌హిస్తోంది. సెల‌బ్రిటీల‌తో ర‌క‌ర‌కాల ప‌నులు చేయించ‌డ‌మే ఆ ప్రోగ్రామ్ ల‌క్ష్యం.

ఇప్ప‌టికే ర‌కుల్‌ తో కూర‌గాయ‌లు అమ్మించింది, రానాని ముఠామేస్త్రి చేసింది. ఇప్పుడు మోహ‌న్‌ బాబు వంతొచ్చింది. తిరుప‌తిలోని శ్రీ విద్యానికేత‌న్ ఎదురుగానే బ‌డ్డీ కొట్టు పెట్టించి అక్క‌డ మోహ‌న్‌ బాబుతో ఇడ్లీ - దోసెలు అమ్మించింది ల‌క్ష్మీప్ర‌స‌న్న‌. పొద్దు పొద్దున్నే మోహ‌న్‌ బాబుగారు ఇడ్లీలు - దోసెలు అని అమ్ముతూ ఉంటే అక్క‌డున్న‌వాళ్లంతా గుమికూడి మ‌రీ వాటిని ఆరగించారు. మంచి ప‌ని కోసం ఎప్పుడూ ముందుండే మోహ‌న్‌ బాబు ఏమాత్రం మొహ‌మాటం ప‌డ‌కుండా ఇడ్లీలు అమ్మాడు. త‌న వంతుగా మేముసైతంకి సాయ‌మందించాడు.