'మోసగాళ్ల' వెనుక బలమైన ఎమోషన్స్ ఉంటాయి: మోహన్ బాబు

మంచు విష్ణు కథానాయకుడిగా 'మోసగాళ్లు' రూపొందింది. జెఫ్రీ గీ చిన్ దర్శకత్వం వహించిన ఈ సినిమాను ఈ నెల 19వ తేదీన విడుదల చేయనున్నారు. పాన్ ఇండియా స్థాయిలో విడుదలవుతున్న ఈ సినిమాలో కాజల్ .. సునీల్ శెట్టి కీలకమైన పాత్రలను పోషించారు. నవదీప్ .. నవీన్ చంద్ర ముఖ్యమైన పాత్రల్లో కనిపించనున్నారు. 50 కోట్ల రూపాయాల బడ్జెట్ తో ఈ సినిమాను నిర్మించినట్టుగా మంచు విష్ణు చెప్పడంతో, ఈ సినిమాపై అందరిలోను ఆసక్తి ఉంది. ఈ సందర్భంగా ఈ సినిమా ప్రీ రిలీజ్ ఈవెంట్ ను నిన్నరాత్రి జరుపుకుంది.

ఈ సందర్భంగా మోహన్ బాబు మాట్లాడుతూ .. ముందుగా సునీల్ శెట్టిని గురించి ప్రస్తావించారు. "విష్ణు ఈ సినిమాలో మీకు అవకాశం ఇవ్వలేదు .. మీరే విష్ణుకు మీతో చేసే అవకాశం ఇచ్చారు. మీలాంటి గొప్పనటులు ఈ సినిమాలో చేయడం నాకు చాలా సంతోషాన్ని కలిగించింది" అంటూ ఆయనకి శాలువ కప్పి అభినందించారు. అదే సమయంలో నేరుగా రానా స్టేజ్ పైకి వచ్చేశాడు. ఆయన రావడం ఆలస్యం కావడంతో మోహన్ బాబు సరదాగా చిరుకోపాన్ని ప్రదర్శించారు. ఆ తరువాత ఆయన కాజల్ గురించి మాట్లాడుతూ, విష్ణు అక్కగా నటించడానికి ఆమె అంగీకరించడం పట్ల అభినందనలు అందజేశారు.

జీవితంలో ప్రతి వ్యక్తి ఏదో ఒక సందర్భంలో ఏదో ఒక విధంగా మోసపోతాడు. ఎవరైనా సరే నాకు మంచి తెలివి తేటలు ఉన్నాయి .. నేను ఎక్కడా మోసపోను అంటే అంతకి మించిన అమాయకత్వం మరొకటి లేదు. ఇది ఒక భారీ స్కామ్ చుట్టూ తిరిగే కథ. నాకు తెలిసి భారతదేశంలో ఇంతపెద్ద స్కామ్ జరగలేదు. యూత్ అంతా కూడా తప్పకుండా చూడవలసిన సినిమా ఇది. ఒక అక్కా తమ్ముడు కలిసి ఎలాంటి పరిస్థితులను ఎదుర్కొన్నారు? ఎందుకు వాళ్లు స్కామ్ చేయవలసి వచ్చింది? అనే పాయింట్ వెనుక ఎమోషన్స్ తో కూడిన నేపథ్యం ఉంటుంది. మార్చి 19 నేను పుట్టినరోజు .. అందువల్లనే విష్ణు ఆ రోజున ఈ సినిమాను విడుదల చేస్తున్నాడు. ఈ సినిమా తప్పకుండా విజయాన్ని సాధించాలని మనస్ఫూర్తిగా కోరుకుంటున్నాను" అని చెప్పుకొచ్చారు.