అందుకోసం విష్ణు ముంబయిలో ఏడాది తిరిగాడుః మోహన్‌ బాబు

మంచు విష్ణు.. సునీల్ శెట్టి.. కాజల్‌ కీలక పాత్రలో నటించిన మోసగాళ్లు సినిమా విడుదలకు సిద్దం అయ్యింది. రియల్‌ సంఘటనల ఆధారంగా ఈ సినిమా ను రూపొందించిన విషయం తెల్సిందే. అతి పెద్ద రియల్ ఐటీ స్కాం ను కథ వస్తువుగా తీసుకుని రూపొందించిన ఈ సినిమా ప్రీ రిలీజ్ వేడుక తాజాగా హైదరాబాద్ లో జరిగింది. ఈ వేడుకలో మోహన్‌ బాబు ముఖ్య అతిథిగా హాజరు అయ్యారు. ప్రతి మనిషి జీవితంలో ఒకరి చేతిలో మోస పోవడం కాని లేదా ఎవరినైనా మోసం చేయడం కాని జరుగుతుంది. మీ జీవితంలో మిమ్ములను మోసం చేసిన వారు అంటూ సరదాగా కార్యక్రమాన్ని హోస్ట్‌ చేసిన యాంకర్స్‌ వచ్చిన గెస్ట్‌ లను ఇతరులను అడిగారు. పలువురు పలు రకాల సమాధానాలు చెప్పారు.

మోహన్‌ బాబు మాత్రం రెఢీ సమయంలో నాతో ఒక సినిమా చేస్తానంటూ శ్రీనువైట్ల చెప్పి ఇప్పటి వరకు చేయకుండా మోసం చేశాడంటూ నవ్వులు పూయించాడు. ఆ తర్వాత స్టేజ్ పై మోహన్‌ బాబు మాట్లాడుతూ.. ఈ సినిమా కోసం విష్ణు పడ్డ కష్టం అంతా ఇంతా కాదు. ముంబయిలో ఏడాది పాటు తిరిగి స్కాం వెనుక ఉన్న అసలు విషయాలను తెలుసుకునేందుకు ప్రయత్నించాడు. విష్ణు మరియు కాజల్ ల మద్య ఉండే బ్రదర్‌ సిస్టర్‌ సన్నివేశాలు చాలా బాగున్నాయి. విష్ణు ఒక మంచి కథను ఎంపిక చేసుకుని అద్బుతమైన నటనతో మెప్పించాడు. తప్పకుండా అందరికి నచ్చేలా ఉంటుందంటూ చిత్ర యూనిట్‌ సభ్యులందరికి కూడా మోహన్‌ బాబు అభినందనలు తెలియజేశాడు.