హరికృష్ణ కాదు.. మోహన్ లాల్

మొత్తానికి ‘నాన్నకు ప్రేమతో’ తర్వాత ఎన్టీఆర్ చేయబోయే సినిమా ఏదో తేలిపోయింది. ‘శ్రీమంతుడు’ లాంటి బ్లాక్ బస్టర్ హిట్టు కొట్టిన కొరటాల శివ దర్శకత్వంలో సినిమాను పట్టాలెక్కించేశాడు యంగ్ టైగర్. ఈ సినిమాకు హీరోయిన్ గా శ్రుతి హాసన్ లేదా పరిణీతి చోప్రా ఎంపిక కావచ్చని వార్తలు వస్తున్నాయి. ఐతే ఈ సినిమా కోసం హీరోయిన్ కంటే కూడా ముఖ్యమైన పాత్ర ఒకటి రెడీ చేశాడు కొరటాల. హీరో తర్వాత సినిమాలో హైలైట్ గా నిలిచేది ఆ పాత్రేనట. దాని కోసం హరికృష్ణను సంప్రదిస్తున్నట్లు వార్తలొచ్చాయి. ఐతే అది రూమరేనని.. అసలు హరికృష్ణకు మళ్లీ సినిమాల్లో నటించే ఉద్దేశమే లేదని తెలుస్తోంది.

ఈ పాత్ర కోసం మలయాళ సూపర్ స్టార్ మోహన్ లాల్‌ ను కొరటాల సంప్రదిస్తున్నట్లు సమాచారం. ఇందుకోసం కొరటాల నేరుగా కేరళకే వెళ్లి మోహన్ లాల్ తో మాట్లాడుతున్నాడట. కొరటాల శివ తొలి రెండు సినిమాల్లో సత్యరాజ్, జగపతి బాబుల పాత్రలు ఎంతగా హైలైట్ అయ్యాయో తెలిసిందే. ఎన్టీఆర్ సినిమాలోని పాత్ర కూడా అలాగే ఉంటుందట. దాన్ని మోహన్ లాల్ తోనే చేయించాలని పట్టుదలతో ఉన్నాడట కొరటాల. మోహన్ లాల్ ఇప్పటిదాకా తెలుగులో ఒకే ఒక్క సినిమా చేశాడు. అది నందమూరి హీరో బాలయ్యతోనే కావడం విశేషం. ప్రియదర్శన్ సినిమా ‘గాంఢీవం’లో ఓ పాటలో తళుక్కుమన్నాడు మోహన్ లాల్. ఎన్టీఆర్ సినిమాకు ఓకే చెబితే మళ్లీ నందమూరి హీరో సినిమాతోనే తెలుగులోకి పునరామనం చేయబోతున్నట్లు అవుతుంది.