ఒకే వేదిక‌పై ఇద్ద‌రు లెజెండ్స్‌

ఒకే వేదిక‌పై ఇద్ద‌రు అభిమాన లెజెండ‌రీ న‌టుల‌ని చూస్తూ ఆ ఫీల్ వేరే లెవెల్‌. వారిని మ‌ళ్లీ మ‌ళ్లీ ఇలాగే చూడాల‌ని కోరుకోని అభిమాని అంటూ వుండ‌రు. అలాంటి అరుదైన కాంబినేష‌న్ మ‌ల‌యాళ బిగ్ బాస్ వేదిక‌గా సాక్షాత్కార‌మైంది. వివ‌రాల్లోకి వెళితే... యూనివ‌ర్స‌ల్ స్టార్ క‌మ‌ల్ హాస‌న్ దాదాపు నాలుగేళ్ల విరామం త‌రువాత న‌టించిన మూవీ `విక్ర‌మ్‌`. యంగ్ టాలెంటెడ్ డైరెక్ట‌ర్ లోకేష్ క‌న‌గ‌రాజ్ ఈ మూవీకి ద‌ర్శ‌క‌త్వం వ‌హించారు. ఈ మూవీపై భారీ అంచ‌నాలు ఏర్ప‌డ్డాయి.

రాజ్ క‌మ‌ల్ ఇంట‌ర్నేష‌న‌ల్ బ్యాన‌ర్ పై ఆర్‌. మ‌హేంద్ర‌న్ తో క‌లిసి క‌మ‌ల్ హాస‌న్ అత్యంత భారీ స్థాయిలో ఈ మూవీని నిర్మించారు. ఇటీవ‌ల విడుద‌ల చేసిన ట్రైల‌ర్, ఫ‌స్ట్ సింగిల్ తో సినిమాపై అంచ‌నాలు ఏర్ప‌డ్డాయి. ఆ అంచ‌నాల‌కు ఏ మాత్రం తీసిపోని స్థాయిలో సినిమా వుంటుంద‌ని తెలుస్తోంది. 1986లో వ‌చ్చిన `విక్ర‌మ్‌` మూవీకి ఈ చిత్రానికి హీరో క్యారెక్ట‌ర్ ప‌రంగా సంబంధం వున్న‌ట్టుగా తెలుస్తోంది. కొన్నేళ్ల క్రితం వ‌చ్చిన విక్ర‌మ్ లో హీరో రా ఏజెంట్‌. తాజా `విక్ర‌మ్`లోనూ హీరో పాత్ర రా ఏజెంట్ కావ‌డం ఆస‌క్తిని రేకెత్తిస్తోంది.

జూన్ 3న భారీ స్థాయిలో ఈ మూవీని ఐదు భాష‌ల్లో పాన్ ఇండియా లెవెల్లో విడుద‌ల చేస్తున్నారు. తెలుగులో మాత్రం ఈ మూవీని స్టార్ హీరో నితిన్ ఫాద‌ర్ ఎన్‌. సుధాక‌ర్ రెడ్డి శ్రేష్ట్ మూవీస్ బ్యాన‌ర్ పై విడుద‌ల చేస్తున్నారు. రిలీజ్ డేట్ ద‌గ్గ‌ర‌ప‌డుతున్న నేప‌థ్యంలో క‌మ‌ల్ హాస‌న్ ప్ర‌మోష‌న్స్ ని స్పీడ‌ప్ చేశారు. ఇటీవ‌లే `మ‌త్తుగ మ‌త్తుగా ..` అంటూ సాగే ఊర మాస్ బీట్ కు అనిరుథ్ అందించిన సంగీతం ఆక‌ట్టుకుంటోంది.

ఇదిలా వుంటే ఈ మూవీ రిలీజ్ కోసం ప్ర‌మోష‌న్స్ మొద‌లు పెట్టిన క‌మ‌ల్ హాస‌న్ ఇటీవ‌లే జ‌రిగిన 75వ కేన్స్ ఫిల్మ్ ఫెస్టివెల్ లోనూ ఈ మూవీని ప్ర‌మోట్ చేశారు. ఆ త‌రువాత ముంబై, ఢిల్లీల్లోనూ ప్ర‌త్యేకంగా ప్ర‌మోష‌న్స్ నిర్వ‌హించిన క‌మ‌ల్ ప్ర‌స్తుతం కేర‌ళ‌లో ప్ర‌మోట్ చేస్తున్నారు. ఇందు కోసం లెజెండ‌రీ యాక్ట‌ర్ మోహ‌న్ లాల్ హోస్ట్ గా వ్య‌వ‌హ‌రిస్తున్న బిగ్ బాస్ రియాలిటీ షోని ఎంచుకున్నారు. ఈ షోలోకి ఎంట్రి ఇచ్చిన క‌మ‌ల్ బ్లూ క‌ల‌ర్ డెనిమ్ బ్లేజ‌ర్ తో అద‌ర‌గొట్టాడు.

ఇక హోస్ట్ గా వ్య‌వ‌హ‌రిస్తున్న మోహ‌న్ లాల్ కూడా థిక్ బ్లూ క‌ల‌ర్ బ్లేజ‌ర్ లో ద‌ర్శ‌న మిచ్చారు. తాజాగా బ‌య‌టికి వ‌చ్చిన ఓ స్టిల్ ఆక‌ట్టుకుంటోంది. మోహ‌న్ లాల్ మాస్ట‌ర్ త‌ర‌హాలో క‌మ‌ల్ ని తీక్ష‌ణంగా చూస్తుంటే క‌మ‌ల్ మాత్రం ఓ స్టూడెంట్ ల క‌నిపిస్తున్న ఫొటో ప్ర‌స్తుతం నెట్టింట సంద‌డి చేస్తోంది. క‌మ‌ల్ హాస‌న్ గ‌త కొన్ని సీజ‌న్ ల వ‌ర‌కు త‌మిళ బిగ్ బాస్ కు హోస్ట్ గా వ్య‌వ‌హ‌రించి ఇటీవ‌లే త‌ప్పుకున్న విష‌యం తెలిసిందే.