మోహన్ లాల్ ‘మన్యం పులి’గా వస్తున్నాడు

90ల్లో మోహన్ లాల్ సినిమాలు కొన్ని తెలుగులో అనువాదమయ్యాయి. ‘యోధ’ లాంటి సినిమాలతో ఆయనకు మంచి గుర్తింపే వచ్చింది. కానీ ఆ తర్వాత ఆయన సినిమాలు తెలుగులోకి డబ్ చేయడం మానేశారు. ఐతే ఈ మధ్యే మనమంతా.. జనతా గ్యారేజ్ లాంటి డైరెక్ట్ సినిమాలతోనే తెలుగు ప్రేక్షకులపై బలమైన ముద్ర వేశాడు ఈ మలయాళ సూపర్ స్టార్. ఈ నేపథ్యంలోనే లాల్ కొత్త సినిమాను తెలుగులోకి అనువదించి రిలీజ్ చేయబోతున్నారు. ఆ సినిమానే ‘పులి మురుగన్’. గత శుక్రవారమే ఈ చిత్రం మలయాళంలో రిలీజై బ్లాక్ బస్టర్ హిట్టయింది. వారం రోజుల్లోనే రూ.35 కోట్లు కొల్లగొట్టిందీ సినిమా.

‘పులి మురుగన్’ను తెలుగులోకి ‘మన్యం పులి’ పేరుతో అనువదిస్తున్నారు. ఈ రోజే పోస్టర్ కూడా వదిలారు. టైటిల్ లోగో అదిరిపోయేలా డిజైన్ చేశారు. ‘సింధూర పువ్వు’ కృష్ణారెడ్డి ఈ చిత్రాన్ని తెలుగులోకి అందిస్తున్నారు. వైశాఖ్ అనే యువ దర్శకుడు రూపొందించిన ఈ సినిమాలో మోహన్ లాల్ సరసన కమలిని ముఖర్జీ కథానాయికగా నటించడం విశేషం. అంతే కాదు మన జగపతి బాబు ఇందులో విలన్ క్యారెక్టర్ చేశాడు. కాబట్టి ‘మన్యం పులి’ తెలుగు ప్రేక్షకులకు బాగానే కనెక్టయ్యే అవకాశముంది. కేరళలోని దట్టమైన అడవుల్లో ఈ సినిమాను చిత్రీకరించారు. లాల్ ఇందులో అడవిలోనే నివసించే యోధుడి పాత్రలో కనిపిస్తున్నాడు. త్వరలోనే ఈ చిత్రాన్ని తెలుగులో రిలీజ్ చేయనున్నారు.

Like Us on Facebook : https://www.facebook.com/Tupakidotcom/